STAE Covalima distribui materiál eleisaun prezidensiál ba sentru votasaun 80
COVALIMA, 18 abríl 2022 (TATOLI)—Administradór Munisípiu Covalima Francisco de Andrade hateten, Sekretáriadu Tékniku Administrasaun Eleitorál (STAE) ho Komisaun Nasionál Eleisaun (CNE, sigla portugés) distribui ona materiál eleisaun prezidensiál segunda volta ba sentru votasaun 80 no estasaun votasaun 92.
Notísia Relevante: STAE Covalima hahú halo pakote ba materiál eleisaun segunda volta
“Ohin, ita-halo distribuisaun materiál eleisaun sensitivu ho la’ós sensitivu ba eleisaun prezidensial segunda volta nian. Molok atu halo distribiusaun, fiskál kandidatu na’in-rua nian hamutuk ho STAE-CNE halo ona observasaun,” Autoridade Covalima, Francisco de Andrade, hato’o liuhosi nia diskursu, molok distribui materiál eleisaun prezidensiál iha eis eskola pre-sekundáriu Sandalo, Kampung Baru, segunda ne’e
Autoridade munisipál ne’e garante ba brigada, pontu vokál no membru Polísia Nasionál Timor-Leste (PNTL) sira la’ós ema-ne’ebé foun no atu labele repete erru ne’ebé akontese iha eleisaun prezidensiál primeira volta liuba ne’e.
“Eleisaun primeira volta, ha’u simu preokupasaun barak hosi komunidade, brigada no membru ne’ebé destakadu halo erru, nune’e ba eleisaun segunda volta ne’e labele repete tan erru sira uluk nian. Se repete erru hanesan ne’e, konsidera fraude eleitorál,” nia dehan.
Nune’e mós, autoridade sira iha postu adminstrativu hamutuk ho líder komunitáriu sira tenke kontrola no fó korajen ba komunidade hodi ezerse sira-nia direitu votu, tanba eleisaun prezidensiál ne’e akontese no realiza iha tinan lima (5) dala ida.
Tanba ne’e, nia apela ba membru PNTL Covalima no brigada sira iha sentru votasaun 80 ne’e labele hala’o fali kampaña bainhira realiza eleisaun iha sentru votasaun sira.
“Ha’u husu brigada no PNTL sira, ita-boot sira atu ezerse ita-boot sira-nia direitu votu ho konsiénsia hodi labele halo kampaña iha sentru votasaun liu-liu ba brigada sira,” nia dehan.
Komandante PNTL Munisípiu Covalima, Superintedente Basilio de Jesus reforsa, hateten prezensa membru seguransa iha sentru votasuan atu fó seguransa masímu ba prosesu eleisaun, nune’e la fó espasu ba sidadaun atu destroi prosesu eleisaun.
“Ita la fó espasu ba sé de’it tenta destroi prosesu eleisaun ne’e la’o. Ha’u orienta no apela ba seguransa hotu laiha toleránsia no dalan seluk, la’ós ona tempu ita-atu eduka no hamaus ema tenke atua ho rigor,” nia hateten.
Komandu PNTL Covalima ne’e mós la autoriza membru PNTL sira atu halo diskusaun politíka no bainhira ezerse sira-nia direitu eleitorál iha sentru votasaun kona-ba kandidatu prezidente na’in-rua
“Ha’u fó atensaun másimu ba seguransa, prezensa membru PNTL iha sentu votasaun atu fó seguransa másimu iha sentru votasaun no sei la halo diskusaun ba asuntu ne’ebé laiha relevante ho seguransa no la konversa asuntu politíka direitu eleitoral sira-nian,” nia hateten.
Tuir dadus hosi STAE haktuir, eleitór ne’ebé atu ezerse sira-nia direitu votu iha loron 19 fulan-marsu 2022 ne’e hamutuk 47,807, ne’ebé kompostu hosi mane 2,4446 no feto 2,3361 no ezerse sira-nia direitu votu iha sentru votasaun hamutuk 80 no estasaun votasaun hamutuk 92.
Jornalista : Celestina Teles
Editór : Cancio Ximenes
