DILI, 19 abril 2022 (TATOLI)—Prezidente Asosiasaun Halibur Defisiénsia Matan Timor-Leste (AHMDTL), Gaspar Afonso, sente orgullu tanba hetan oportunidade ezerse direitu votu iha eleisaun prezidensiál primeira no segunda volta tinan 2022, maibé ladún kontente tanba laiha segredu bainhira ezerse votu iha kabina laran.
“Ami-nia votu ne’e la absoluta, tanba bainhira ami ba vota ema seluk maka akompaña ami iha kabina laran. Tanba ne’e, ami la sente kontente ho modelu eleisaun ida hanesan ne’e,” Prezidente Asosiasaun hateten iha sentru votasaun suku Bemori, tersa ne’e.
Notísia relevante: AHDMTL promove edukasaun inkluzivu ba profesór EBC Manleuana
Ba kestaun ne’e, reprezentante asosiasaun husu ba Komisaun Nasionál Eleisaun (CNE, sigla portugés) no Sekretariadu Tékniku Administrasaun Eleitorál (STAE) atu komunika ho ezekutivu sira hodi inisia lejizlasaun ka polítika ruma hodi fó asesibilidade iha ámbitu eleisaun ba ema hotu hanesan.
“Ami hakarak tinan-lima mai bele vota mesak uza buletin votu ho modelu template braille, ne’e sukat de’it medida buletin votu, hafoin ami defisiénsia la’o tuir de’it, ne’ebé kada tinan-lima kuandu eleisaun buletin votu hanesan ne’e prepara ona iha sentru votasaun, hanesan buat ne’ebé nasaun viziñu hanesan Indonézia halo ona,” nia akresenta.
Biban ne’e, Prezidente AHDMTL hato’o mensajen ba Kandidatu Prezidente Repúblika ho númeru sorteiu 01, José Ramos Horta no númeru sorteiu 02, Francisco Guterres ‘Lú Olo’, sé de’it mak eleitu, labele haluha kumpre promesa ne’ebé hato’o ba povu iha tempu kampaña.
“Eleisaun ne’e ita atu deside futuru ba rai ida-ne’e, hili Aman ba nasaun ne’e tanba ita adopta sistema prezidensialista. Tanba ne’e, hosi na’in-rua, ida avansa tenke tau iha prátika hodi realiza promesa ne’ebé hato’o ona iha kampaña,” nia tenik.
Reprezentante asosiasaun ne’e dehan, maski labele haree, maibé membru sira iha neon atu sente.
Tuir dadus hosi AHDMTL, iha tinan 2011 to’o 2021, totál ema defisiénsia matan iha Timor hamutuk 277, kompostu hosi feto 132 no mane 145.
Jornalista : Tomé Amado
Editora : Julia Chatarina
