DILI, 19 abril 2022 (TATOLI)—Arsebispu Arkidioseze Metropolitana Dili, Dom Virgílio do Carmo da Silva, iha esperansa ba Prezidente Repúblika (PR) ne’ebé eleitu tenke bali Konstituisaun Repúblika Demokrátika Timor-Leste (RDTL).
“Ha’u-nia esperansa hosi Kandidatu Prezidente Repúblika rua ne’e, sé mak eleitu tenke bali Konstituisaun RDTL tanba ida-ne’e mak sasukat atubele garante rai ne’e la’o loos. Tanba ne’e, firme kaer metin Konstituisaun no hanorin ba ema hotu iha disiplina hodi lori rai ida-ne’e iha pás, prosperidade no hadomi demokrasia tuir dalan loloos to’o rohan,” Dom Virgílio hateten hafoin ezerse direitu votu iha sede suku Bidau Lecidere, tersa ne’e.
Notísia relevante: Dom Virgílio deseja eleisaun prezidensiál segunda ronda sei la’o di’ak
Nune’e, Amu Bispu dehan, sé de’it mak povu fó fiar sai aman nasaun tenke hatene hakuak oan hotu.
“Tanba sai ona aman ba nasaun, laiha ona katak ida-ne’e mak ha’u-nia ema ka grupu maibé tenke haree ema hotu hanesan, tanba povu maioria fó fiar ona ba ita sai aman ba rai ida-ne’e, tenke ezerse direitu hanesan aman ba nasaun. Hakuak sinál unidade ninian, ida-ne’e mak ita hotu nia hakarak,” nia akresenta.
Biban ne’e, Amu Bispu hato’o mensajen ba Kandidatu númeru sorteiu 01, José Ramos Horta no Kandidatu númeru sorteiu 02, Francisco Guterres ‘Lú Olo’, sé de’it mak eleitu sai Prezidente Repúblika tenke hatene hakbesik-an ba nia povu.
“Labele hein tempu kampaña mak tuun ba hakbesik povu, maibé iha tempu baibain mós presiza hakbesik, nune’e bele hatene povu nia aspirasaun. Ohin ha’u ezerse direitu votu ho sentimentu kontente tanba ezerse direitu demokrátiku tanba hafoin eleisaun prezidensiál dahuluk ita hetan tan oportunidade daruak atubele determina loloos ita-nia Prezidente Repúblika,” nia akresenta.
Dom Virgílio fó parabéns ba povu tomak, liuliu apoiante ba kandidatu rua ne’ebé kompete, tanba votasaun primeira volta la’o ho di’ak, maski dalaruma durante kampaña mosu naksalak ba malu maibé to’o tempu votasaun povu hatudu maturidade di’ak.
“Atitude ne’e mak ha’u dejezu, hein katak bele kontinua mai segunda volta. Ita hotu tenke tau iha ita-nia neon no simu rezultadu ne’ebé sei akontese, maski iha tempu kampaña, esforsu hotu ita halo maibé povu mak determina sé mak sei manán. Ita tenke respeita rezultadu saida de’it mak mai, ida-ne’e mak povu hakarak no hili sai nai ulun ba rai ida-ne’e ba tinan-lima mai,” nia subliña.
Amu Bispu ezerse nia direitu votu iha sede suku Bidau Lecidere iha oras 07:52 dadeer.
Joranalista : Arminda Fonseca
Editora : Julia Chatarina
