DILI, 19 abril 2022 (TATOLI)—Primeiru-Ministru (PM), Taur Matan Ruak, iha espetativa ba Prezidente Repúblika (PR) eleitu ba períodu 2022-2027 bele kolabora di’ak ho Governu, nune’e bele ezekuta programa ba povu nia interese.
“Husu Prezidente Repúblika atu hametin estabilidade polítika, governativa, dudu dezenvolvimentu ba-oin, inklui kombate kiak no mukit iha nasaun, tanba ne’e prioridade númeru um,” Taur deklara hafoin ezerse votu iha sentru votasaun Eskola Primária iha aldeia 17 de abril, suku Metiaut, postu administrativu Cristo Rei, tersa ne’e.
Biban ne’e, Xefe Governu konvida povu tomak hodi mantein kria kondisaun hakmatek no prepara-an serbisu maka’as liután ba oin.
“Povu sira tenke koopera ho Governu tanba ami iha programa barak hodi ajuda dezenvolve no hadi’a povu-nia moris,” nia akresenta.
Notísia relevante: Partidu tolu apoiu Lú Olo iha eleisaun segunda volta
Maski nune’e, atuál Prezidente Partidu Libertasaun Populár (PLP) ne’ebé fó apoiu ba Kandidatu Prezidente Repúblika hosi Partidu Frente Revolucionária do Timor-Leste Independente (FRETILIN), ho númeru sorteiu 02, Francisco Guterres ‘Lú Olo’, otimista kandidatu ne’ebé nia hili sei hetan vitória iha períodu ne’e.
“Ha’u vota númeru 2. Ha’u la preparadu para lakon, tenki manán. Ha’u-nia kandidatu mak manán,” nia tenik.
Iha sorin seluk, Taur konsidera deklasaun polítika ne’ebé hato’o durante kampaña eleitorál ne’e normál iha vida polítika, tanba kada tinan-lima idaidak partisipa festa demokrasia no bainhira ramata, idaidak hakmatek hodi hala’o serbisu.
Jornalista : Antónia Gusmão
Editora : Julia Chatarina
