Populasaun Covalima husu kandidatu ne’ebé eleitu labele sai PR ba partidu
COVALIMA, 19 abríl 2022 (TATOLI)—Populasaun Timor-Leste liu-liu iha munisípiu Covalima husu ba Prezidente Repúblika foun ba períodu 2022-2027 labele sai prezidente ba partidu maibé koopera ho Governu hodi dezenvolve nasaun ba povu nia moris di’ak.
Populasaun iha territóriu Timor-Leste ne’ebé ho idade 17 ba leten ezerse sira-nia direitu votu iha eleisaun prezidensiál segunda volta hodi hili kandidatu Prezidente Repúblika hosi Partidu CNRT no FRETILIN, José Ramos Horta no Fancisco Guterres Lú Olo, sai Prezidente Repúblika períodu 2022-2027.
“Ohin loron espesiál ba ita-hotu atu ezerse ita-nia direitu votu hodi hili ita-nia Prezidente Repúblika ho nia mandantu tinan lima. Entre kandidatu na’in-rua ne’e, na’in-ida sai eleitu ba Prezidente Repúblika tenke sai Prezidente ba povu tomak no labele sai PR ba partidu. Ami povu hakarak dezenvolvimentu, moris livre no hetan moris di’ak,” Votante Agostihno Soriano informa ba Agência Tatoli, iha sentru votasaun EBC Ogues, postu administrativu Maucatar, munisípiu Covalima, tersa ne’e.
Durante hala’o kampaña eleitorál iha territóriu nasionál ne’e, kandidatu na’in-rua hato’o sira-nia kompromísiu polítika liu-liu iha munisípiu Covalima sei fó prioridade ba dezenvolvimentu infraestrutura ba komunidade iha área rurál ne’ebé populasaun seidauk asesu eletrisidade, estrada, edukasaun no saúde.
“Ha’u sente durante kandidatu sira realiza kampañia eleitorál sira haree ona kondisaun loloos ne’ebé ita-nia sosiedade hasoru, tau ona iha planu no programa hodi responde problema ne’ebé ita-nia sosiedade hasoru ba iha sira-nia vida loro-loron nian, nune’e bele hamosu futuru ida ho pás no estabilidade,” nia dehan.
Eleitór Jonas Felix Gabriel Amarál reforsa, nu’udar sidadaun tenke ezerse direitu votu iha sentru votasaun ne’ebé mak Governu estabele ona maibé tenke vota ho konsiénsia.
“Ha’u nu’udar eletór ne’ebé ezerse ha’u nia direitu votu hodi hili kandidatu Prezidente Repúblika ne’ebé di’akliu hodi ukun nasaun Timor-Leste durante nia mandatu tinan lima, no tau matan ba povu tanba povu hakarak buka moris ho livre,” nia hateten.
Nune’e, nia dehan, povu sira-ne’ebé hela iha área rurál presiza dezenvolvimentu hodi dezenvove setór sira hanesan setór saúde, edukasaun no infraestrutura.
Votante Julio do Carmo hateten, kandidatu na’in-rua nu’udar sidadaun timor-oan, maibé hili prezidente ida-ne’ebé di’ak hodi tau matan ba povu nia moris di’ak tanba povu hakarak moris livre hodi buka moris.
“Ha’u hatene Prezidente Repúblika, nia laiha programa no Governu mak iha programa, maibé Prezidente Repúblika bele propoin ba Governu tanba PR hala’o nia knar no haktuir nia kompeténsia tomak bazea ba konstitusaun RDTL haruka, nia dehan.
Tuir observasaun Agência Tatoli iha terrenu katak, durante ne’e hala’o iha sentru votasaun eskola bázika sentrál Ogués ne’e observa hosi fiskál kandidatu prezidente repúblika na’in-rua no hetan seguransa masímu hosi Polisia Nasionál Timor-leste (PNTL).
Jornalista : Celestina Teles
Editór : Cancio Ximenes
