OPINIAUN

Korrupsaun no demokrasia

Korrupsaun no demokrasia

Hakerek nain, Rosário S. Araújo.

Hosi:

Rosário S.Araújo

Leitór sira, tanbasá mak korrupsaun sei moris no eziste nafatin iha  Nasaun ida ne’ebé mak opta sistema demokrasia? teoria barak saliente katak korrupsaun promovidu iha sistema polítiku iha partidu ida (Doig, 1984) mezmu laiha Nasaun demokrasia ida iha mundu mak livre husi korrupsaun.

Liu tiha tinan 20, istória independensia nian, to’o ona nia tempu hodi avalia katak reformasaun polítika sira falla atu hasees tiha rejime korrupsaun ne’ebé kuaze eziste hela iha tempu okupasaun sira, transforma de’it korrupsaun iha rejime okupasaun nian depois referendum iha 1999, nune’e haree ba asuntu hirak ne’e, Vedi Hadiz, sientifiku polítiku husi Universidade Murdoch, hola konklusaun katak orgaun demokrasia sira nu’udar produtu reformasaun ne’ebé haksumik husi predatór élite sira, ho lian seluk reformasaun burokrasia ne’ebé sei foka ba hadi’a mekanismu sira iha governasaun tuir mekanismu transparénsia, akuntavel, partisipasaun no haforsa rule of law ne’ebé la involve élite burokrata sira  ne’ebé nia kareira sira haboot, buras no hamoris iha sistema korrupsaun perante iha rejime okupasaun sira nia laran, ema hirak ne’e mak sei tama iha realidade oinsá sei prevene servisu meritokrasia hodi hamoris fila-fali burokrasia moderna ne’ebé moos iha nia sistema governasaun sira.

Iha parte seluk reformasaun polítiku sira ho prosedurál instituisaun demokrasia, hanesan regra iha partidu polítiku sira, sistema eleisaun, no regras sira kona-ba anggariasaun partidu polítiku, kobransa osan no materiál sira ba membru iha partidu polítiku sira ladauk hamoris forsa polítiku foun sira ne’ebé bele kompete ho polítiku tuan sira mak korrup, atu nune’e bele muda sistema sira mak sei apoiu Estadu iha Nasaun ida ne’e.

Dezenvolvimentu demokrasia iha Nasaun ne’e hahú buras daudaun tuir evolusaun mundu teknolojia moderna nian, Nasaun hahú promove-án bainhira Timor-Leste restaura fali nia independensia iha 2002, Nasaun no povu ida mak ho idade ne’ebé relativamente  joven ho esforsu án tomak hadi’a nia uma laran rasik tanba simu responsabilidade todan nu’udar Nasaun soberanu ida.

Públiku nia espetativa ne’ebé aas ba prosesu demokrasia iha Timor-Leste nu’udar instrospeksaun profunda ida hodi sukat Timor-Leste nia prestasaun polítika jere demokrasia tuir saida mak polítiku nain sira-nia kompromisu hodi transforma Nasaun no povu bele hetan tranguilidade ba moris di’ak, konsetu moris di’ak ne’ebé temi iha ne’e lida ba asuntu esensiál sira mak hanesan; redusaun ba pobreza, hamenus mortalidade inan isin rua no má nutrisaun, hamoris vida ekonomia povu nian, kria kampu traballu, uma ne’ebé dignu ba povu, atendimentu saúde sira ne’ebé di’ak no iha nia kontinuidade, hadi’a eletrisidade, bee-moos ba komunidade, estrada no infraestrutura sira ba área remota, ekonomia ne’ebé ekilibriu entre ki’ik no boot sira, kauza salariál ba nivel polítiku no profisionál sira, kombate no funu hasoru korrupsaun, hasa’e kualidade edukasaun ba ema hotu hodi laiha separasaun ba kiak no riku, poder boot no mukit sira, atensaun ba ambiente sidade kapitál ne’ebé nakonu ho foer no rai rahun, hadi’a merkadu ne’ebé di’ak no dignu ba populasaun sira, fasilidade ospitál ne’ebé dignu ba ema hotu hodi hetan tratamentu hanesan no la separa boot sira ho povu ki’ik sira no seluk tan.

Konteudu hirak ne’e nu’udar direitu báziku ema-nian ne’ebé laiha ema, sé de’it ka ukun nain, polítiku ruma bele ignora asuntu hirak ne’e, tanba konsagra ona iha konstituisaun RDTL titúlu III direitu no dever ekonómiku, sosiál no kulturál, artigu 50 – 61, asuntu hirak ne’e mak loloos tenke sai matéria kampaña ba kandidatu no polítiku nain-sira atu planea no hatuur nu’udar kestaun no prioridade bainhira Governu ida asume knaar foun atu ukun sei simu kedas responsabilidade hirak ne’e hodi hakerek iha metas programa governasaun nian, ezijénsia hirak ne’e mak fatór determinante ba dezenvolvimentu demokrasia iha Nasaun ida bainhira hakarak atu atinje tuir programa, planeamentu nasionál nia kontinuidade ba futuru, programa governasaun ne’ebé di’ak nu’udar orden demokrasia ida ne’ebé vingulativu tuir lei inan haruka, nune’e sei regula komportamentu sira atu kontrolu sosiedade iha Nasaun ida nia moris, sustentabilidade ne’e to’o iha ne’ebé ona embora la’ós kestaun polítiku sira nian maibé oinsá atu governa no ukun di’ak.

Husi observasaun durante partisipa, asiste direta no indireta durante kampaña prezidensiál iha primeira no segunda volta, hatudu momoos katak seidauk iha lider no polítiku nain ida mak ko’alia foku ba asuntu prioritáriu hirak ne’e, barak liu deskreve de’it kona-ba kompeténsia Prezidente Repúblika nian ne’ebé temi iha artigu 85 konstituisaun RDTL, kompeténsia prezidente repúblika nian ne’e presiza hakle’an liután atu konjuga no elabora ho ezemplu realistiku sira kona-ba saida mak esperiénsia Nasaun avansu sira nia prezidente sira bainhira simu knaar no sei halo saida ba Nasaun, kandidatu balun de’it mak ko’alia kona-ba asuntu sira temi iha leten, mezmu matéria barak relevante duni ba knaar prezidente repúblika nian maibé matéria kampañia husi ekipa susesu sira kuaze ko’alia barak liu kona-ba kompeténsia governu nian ne’ebé loloos sei prepara ko’alia iha 2023, iha  pontu ida ne’e bele konsidera nu’udar falla ida iha edukasaun demokrasia ne’ebé erru ba povu, ema hotu iha Nasaun ida tenke hahú ko’alia no simu informasaun sira ne’ebé transparente no loloos kona-ba saida mak funsaun husi eleisaun prezidensiál iha Estadu ida, konstituisaun RDTL artigu 40–42 ko’alia kona-ba ida ne’e, ko’alia informasaun ne’ebé loloos sei ajuda promove sosiedade ida sai sivilizada hodi kumpriende nia direitu no dever sira, la’ós sosiedade ida mak hakarak involve nia án ba halo asaun anarkismu sira, sivilizasaun hahú husi makaer poder sira nia komportamentu ne’ebé bele eduka no atrai sosiedade ida bele muda nia hahalok, tanba ne’e presiza lider sira mak idealista atu sira nia asaun no komportamentu sira ema bele banati, la’ós lider ida mak provokativu, ko’alia la sukat emosaun no pensamentu sosiedade nian, Nasaun presiza lider ida mak ko’alia loloos saida mak nia bele halo, la’ós ko’alia no fó sala fali saida mak ema seluk halo, leitór ita hotu asiste momoos komportamentu hirak ne’e durante kampaña, tanba ne’e ita la presiza tuir saida mak sala, ita tenke tuir ita nia konsiénsia no doutrina kultura no igreja nian ne’ebé hanorin ita kona-ba ko’alia lian ne’ebé loloos.

Tanba ne’e nu’udar  polítiku nain ka kandidatu indepente tenke hahú promove konseitu di’ak sira ne’ebé sei apoiu muda no hamoris pensamentu foun Estadu nian atu apoiu Governu labele la’o sala dalan bainhira kaer ukun, konsekuénsia husi governasaun ne’ebé sala no ukun la-tuir lei sai fatór importante ida hodi prejudika knaar polítika  prezidente repúblika iha Nasaun ida, nune’e nia hamosu kauza ba vida Nasaun nian mak povu mukit no kiak ba nafatin mezmu iha planu no  programa governasaun  hakerek ona iha planu, surat tahan leten, maibé kapasidade ezekusaun sai kauza tanba bele afeta husi aktu má gastu, má administrasaun, irregularidade, familiarizmu, nepotizmu, kolusaun no korrupsaun ba osan no sasan sira, korruptu iha dezisaun sira sei  taka dalan ba Estadu hodi atinje saida mak povu nia hakarak no nesesidade sira, intendimentu ba interese polítiku hamihis interese profisionál iha Estadu ida, nune’e lori Nasaun ba kauza no frajilidade ba vida sosiál no ekonomia.

Leitór, ita aprende husi sofrimentu oin-oin ne’ebé Nasaun infrenta, tanba esperiénsia husi kolonializasaun ne’ebé nakonu ho korruptu iha pasadu tenke sai referénsia ida hodi ukun nain sira bele rekompensa fali sofrimentu hirak ne’e atu hari Nasaun ho prosperiedade hodi hasai povu husi terus oioin, referénsia pasadu hirak ne’e sai mata-dalan ba ukun nain sira atu tetu iha prosesu foti dezisaun tomak ba interesse komun Nasaun nian, polítiku sira bele ajuda, apoiu hadi’a no hatuur hikas prosesu demokrasia ida maka tenke hatuur no trata sidadaun ho dignu ba prosesu dezenvolvimentu hotu iha Estadu ida ne’e, nune’e timor-oan labele sai segunda no terseira klase iha nia rain rasik, sidadaun ida ne’e tenke sai primeira klase iha nia rain rasik depois simu terus husi konsekuénsia kolonializmu ne’ebé halakon direitu tomak durante okupasaun, ida ne’e mak ezijénsia ida husi demokrasia ne’ebé polítiku nain sira tenke hatuur fila fali tuir nia dalan iha Nasaun ida ne’e.

Prosesu demokrasia ne’ebé dadaun la’o reprezenta interese komun povu nian,  hetok liután bainhira ukun-nain sira seidauk foku hodi konsidera luta no kombate korrupsaun nu’udar aktu kriminál ida ne’ebé sei viola Estadu nia integridade no povu-nia moris di’ak, fenómenu hirak ne’e halo povu nia fiar husi loron ba loron ba ukun nain sira hahú mihis, degradasaun morál ba ukun ne’ebé la tau interese komun nu’udar prioridade ba Nasaun maibé interese grupu no partidarizmu sira mak boot liu buat hotu hodi viola lei, nune’e tendensia hodi minimiza valór ne’ebé deskreve iha konstituisaun lulik RDTL nian, akuntabilidade ne’ebé transparensia lakon leet ona husi povu nia mehi, abilidade ba boa prátika iha  orgaun demokrasia sira menus, liu-liu reprezentante partidu polítiku ne’ebé ho nia kbiit tomak hodi hili no nomeia kandidatura prezidente sira la tau asuntu lei kombate korrupsaun no implementasaun lei ne’ebé sei prenxe kritéria sira hanesan harii justisa, utilidade implementasaun lei no lei ne’e rasik sei garante sosiedade nia-moris ne’ebé feliz no sei konserva vida kalma  nu’udar prioridade iha sira nia kampaña polítiku.

Ameasa boot ba demokrasia hahú rekua ba kotuk, tanba kandidatura sira ladauk iha seriedade hodi ko’alia no kampaña kona-ba programa harii Nasaun ida mak dignu ho nia melloridade sira ne’ebé bele apoiu hodi hamoris setór produtivu hotu iha Nasaun. Survey husi Freedom Barometer Asia tinan 2010 relata husi edifísiu Friedrich Naumann Stiftung rejionál sudeste aziátika hatete demokrasia hahú hasoru degradasaun tanba husi survey ne’e rasik nu’udar indikadór ida  hodi sukat nivel liberdade parte polítiku no ekonomia inklui mos lei. Frakeza sira husi implementasaun lei no atendimentu ba kazu korrupsaun sira no intervensaun husi liur ne’ebé afeta ba prosesu demokrasia ne’e rasik bele afeta ba promosaun nivel implemetasaun polítiku ida mak di’ak iha Timor-Leste ba aban bain-rua.

Infrasaun barak ne’ebé mosu husi poder ukun no polítiku sira nu’udar  kauza ida hodi kandidata prezidente sira tenke ko’alia nu’udar referénsia ba ukun di’ak no prátika di’ak iha Nasaun foun ida ne’e, tanba kampaña prezidente sira nian nu’udar meiu komunikasaun verbál direta no indireta ida mak sei muda pensamentu no hahalok ukun nain no polítiku sira bainhira asume poder sei  tau prioridade Nasaun no povu, liu interese hotu-hotu, kombate korrupsaun tenke sai prioridade kandidatura polítiku sé de’it, ida ne’e nu’udar xave hodi salvaguarda Nasaun labele monu ba kiak, nune’e sei hatuur justisa sosiál ida mak ekilibru ba Nasaun.

Kampaña nu’udar meiu edukasaun ba sosiedade atu hamoris no haburas sira nia kumprimenta ba lei no orden Nasaun nian, orden sira sei la’o di’ak bainhira entidade sira bele kumprimenta lei sira ho di’ak, husi ne’e sei hafanu sosiedade bele transforma no muda pensamentu sira negativu nian ba sosiedade ida mak sei iha pensamentu ida mak klean no aas hodi ajusta sirkunstansia hotu hodi harii Nasaun bele sai dignu no hakmatek liután iha futuru,  risku ba ezekusaun lei sira bele sala hodi akontese faan no sosa influénsia polítiku nu’udar meiu ida mak risku iha dezisaun polítiku sira nia lalaok, ida ne’e sei loke hela marjen ida hodi hamoris dezisaun polítiku ne’ebé sala iha futuru, tanba ne’e mak Timor-Leste tenke hahú ho ispíritu foun oinsá hamoris konsiénsia públiku liuhusi edukasaun anti korrupsaun ne’ebé sei muda pensamentu sosiedade nian hodi hatuur hikas kultura kombate korrupsaun nu’udar ámbitu ida mak sei hatoman sosiedade bele halo no prátika tuir.

Luta no kombate korrupsaun, koluzaun, subornu, nepotismu no seluk tan nia posibilidade atu hamoris interese privadu ou hodi kontribui ba orsamentu polítiku nian ne’ebé laiha nia baze legál, baibain akontese iha dezisaun polítiku sira nia knaar, tanba ne’e kampaña polítiku sira presiza haklean liután husi kandidatu sira hodi ajuda harii Estadu ida mak iha nia integridade aas ba Nasaun, baibain influénsia polítiku la to’o iha ne’e de’it, maibé oinsá sei halo servisu ba nia membru sira ne’ebé komete direta no indireta ba aktu korrupsaun nu’udar bani ne’ebé servisu makaas hodi kria nia been ba partidu polítiku sira.

Fenómenu ida ne’e hahú loke prezunsaun sosiedade nian kona-ba realidade distribuisaun poder rekursu sosiál no ekonomia entre partidu polítiku sira, membru  gabinete multi partidu sira-nian ne’ebé hahú konsolida ona tuir interese polítiku longo prazu, ba asuntu hirak hanesan ne’e presiza tebes papel mídia, sosiedade sivíl no ema hotu nian hodi bele apoiu oinsá desliga prátika sira mak la apoiu Estadu nia kompromisu hodi hametin boa governasaun ida mak sei trata asuntu polítika Estadu nian tuir lei ne’ebé vigora iha Nasaun ida ne’e, nune’e sei iha deskobrimentu sira mak bele ajuda polítiku nain sira hola desizaun ba bem estar povu nian, kestaun loloos iha aktu sira korrupsaun no boa governasaun nian tenke sai matéria polítiku nain sira nian, nune’e sei asegura ukun ne’ebé transparensia no la fó kauza ba kontinuidade dezenvolvimentu Nasaun ba oin.

Dala-barak kauza hirak ne’e la’ós mesak de’it, fenómenu ida ne’e nu’udar foho kristál, ne’ebé bele iha posibilidade sei mosu tan kauza sira seluk, perigu husi korrupsaun sei iha posibilidade labele intende didiak iha Nasaun ida ne’ebé hasoru transformasaun orgaun Estadu ida mak foin hakotu Estadu otoritáriu ne’ebé fraku tanba kestaun lideransa. Tanba ne’e kampaña polítiku nu’udar kilat musan di’ak hodi tiru malu ho estratejia iha eventu tinan polítiku ida ne’e, nune’e ikus mai sosiedade mak sei julga iha eleisaun liuhusi fó  valorizasaun ba kandidatu sira ida ne’ebé maka sei merese atu ba tuur iha tronu palásiu hodi simu knaar  ba kaer ukun durante tinan lima ba oin. Lelosae,20422

Hakerek nain servisu iha Komisaun Anti Korrupsaun. Artigu ne’e la reprezenta instituisaun ne’ebé haknaar án ba.

Hanoin ruma bele kontaktu: 670-7732 6592; email: rosariosalsinha@cac.tl

iklan
iklan

Leave a Reply

iklan
error: Content is protected !!