VIQUEQUE, 21 abril 2022 (TATOLI)—Ahi-han mutuk inan-faluk Martina nia uma iha aldeia Aidak-Lara, suku Dilor, postu administrivu Lacluta, munisípiu Viqueque, iha loron 19 abril.
Xefe suku Dilor, Jacinto Ximenes, haktuir, iha dadeersan faluk Martina akompaña ho ninia oan no bei-oan tuir votasaun iha sentru votasaun iha Dilor Vila no hafoin eleisaun hotu sira sei la’o to’o maizumenus tuku 17:00 lorokraik mak sira fila ba uma.
“Bainhira sira to’o iha sira-nia uma, sira haree ahi-han hotu uma. Ema ruma maka sunu karik, sira la haree no sira rasik la hatene kauza hosi akontesimentu ne’e. Ahi-han mutuk no la konsege salva sasán ruma hosi uma-laran,” Autoridade lokál hateten ba Agência Tatoli, via telefónika, kinta ne’e.
Notísia relevante: SEPS apoia vítima inséndiu no inundasaun uma-kain 40 iha RAEOA
Autoridade rekolla ona dadus akontesimentu ai-han uma du’ut no sasán sira iha uma-laran hanesan foos, bikan, kanuru, roupa inklui osan $75 ne’ebé rai iha uma-laran, ba Autoridade munisipál.
“Ha’u rasik ba haree uma ne’ebé ahi-han. Totál família iha uma-laran hamutuk na’in-haat. Depois ha’u foti dadus kona-ba akontesimentu no daudaun prepara ona dokumentu hodi hatama ba munisípiu,” nia hato’o.
Jornalista : Vitorino Lopes da Costa
Editora : Julia Chatarina
