JFP-ADDD promove diskusaun nasionál kona-ba revizaun Konstituisaun RDTL
DÍLI, 12 Juñu 2026 (TATOLI) – Junta Forsa Polítika no Aliadu Defende Direitu Demokrátiku (JFP-ADDD) organiza, sexta ne’e, Fórum Meza Redonda hodi diskute kontekstu revizaun Konstituisaun Repúblika Demokrátika Timor-Leste (RDTL).
Rezultadu husi diskusaun ne’e sei lori ba prosesu konsulta públika iha munisípiu 14 iha teritoriu nasionál.
Prezidente JFP-ADDD, Lucas Soares Colibere, hateten fórum ne’e importante tanba revizaun Konstituisaun RDTL sai baze fundamental ba paz, estabilidade polítika no dezenvolvimentu sustentável.
“Objetivu prinsipál husi fórum ida-ne’e mak atu promove debate ida ne’ebé hala’o iha ambiente unidade, paz no fraternidade entre Timoroan sira, hodi haree oinsá bele hadi’a konstituisaun ho rigor no respeitu ba prinsípiu demokrátiku sira,” Luca ba jornalista sira iha Salaun São José Katedrál, Dili.
Nia esplika katak rezultadu husi fórum ne’e sei aprezenta ba lider nasionál sira, instituisaun relijioza, akadémiku, universidade no komunidade sira iha munisípiu 14 atu fó kontribuisaun antes prepara proposta final.
Reprezentante Arsebispu Arkidiuseze Metropolitana Dili, Pe. Francisco Barreto, ne’ebé mos Vice-Presidente JFP-ADDD, subliña katak prosesu revizaun Konstituisaun tenke tau dignidade umana nu’udar prioridade prinsipál.
“Revizaun Konstituisaun RDTL tenke garante dignidade umana ba sidadaun hotu-hotu. Lei Inan ne’e tenke promove justisa sosiál, moris-di’ak ba povu no sai instrumentu ida atu haforsa unidade nasionál no proteje interese sidadaun, inklui grupu vulnerável,” dehan Pe. Francisco.
Jurista Avelino Coelho, iha nia intervensaun, hateten katak tempu to’o ona atu halo refleksaun klean kona-ba modelu konstitusionál ne’ebé di’ak liu ba Timor-Leste iha futuru.
“Fórum ida-ne’e importante tebes tanba fó espasu aberta ba polítiku, akadémiku no sosiedade sivil atu troka hanoin no diskute klean kona-ba modelu konstitusionál ne’ebé adekuadu ba realidade Timor-Leste,” nia dehan.
Reprezentante Parlamentu Nasionál, Durte Nunes, hateten katak inisiativa ne’e husi Komité JFP-ADDD ho objetivu atu buka modelu konstitusionál ida ne’ebé bele responde ba nesesidade no aspirasaun povu Timor-Leste nian.
Nia mos hatutan katak prosesu revizaun Konstituisaun tenke tuir mekanizmu legál no prosedimentu ne’ebé determina iha Parlamentu Nasionál.
Tuir nia, deputadu sira sei konsidera interese maioria povu nian bainhira halo desizaun kona-ba proposta revizaun ba konstituisaun.
“Karik rezultadu husi diskusaun no konsulta públika sira hetan apoiu husi maioria povu, Parlamentu Nasionál sei analiza no foti desizaun tuir vontade povu nian,” dehan nia.
Fórum ida-ne’e hetan partisipasaun husi partisipante hamutuk nain 350, kompostu husi membru grupu resisténsia, reitór universidade sira, intelektuál, akadémiku no reprezentante sosiedade sivil.
Jornalista: Camílio de Sousa
Editór: Filomeno Martins
