DILI, 21 abril 2022 (TATOLI)—Hafoin Prezidente Repúblika, Francisco Guterres ‘Lú Olo’ promulga dekretu-lei kona-ba atribuisaun subsídiu kombustível ba operadór transporte rodoviáriu públiku, transporte aéreu no marítimu nasionál, inklui adkirente kombustível destinadu ba atividade agríkola no piskatória, maka tempu badak Governu sei implementa.
“Tarde liu semana oin ita-nia operadór transporte rodaviáriu públiku no seluk sei hetan subsídiu kombustível hanaran voucher,” Ministru Petróleu no Minerál (MPM), Victór da Conceição Soares, hateten iha ninia knaar fatin, Bebora, kinta ne’e.
Notísia relevante: PR Lú Olo promulga dekretu-lei subsídiu kombustível
Tuir Ministru, implementasaun lejizlasaun ne’e iha komplexidade tanba presiza kolaborasaun liña ministeriál, instituisaun direta no indireta Estadu hanesan MPM, Ministériu Transporte no Komunikasaun (MTK), Ministériu Turizmu Komérsiu no Indústria (MTKI), Ministériu Agrikultura no Peska (MAP), no seluk tan.
“Kada ministériu ida-idak sei haree ninia serbisu, hanesan MTKI regula kustu kombustível no parte legál hosi MPM inklui ajénsia sira ne’ebé responsável ba regula presu kombustível iha situasaun krize, empreza sira labele inventa presu no halo fali merkadu negru presu, sira-nia marjen lukru tenke tuir nafatin folin ne’ebé iha labele inventa,” nia akresenta.
MAP sei simu dadus hosi baze, kona-ba agrikultór hira mak daudaun halo to’os no natar inklui peskadór sira ne’ebé hala’o atividade peska.
Enkuantu, MTK hatama sertifikadu ka lisensa transporte operasionál hanesan taxi no mikrolete sira ne’ebé rejistradu atu hetan subsídiu, maibé sira ne’ebé la rejistu sei la hetan.
“Ohin ekipa hosi liña ministeriál halo reuniaun no kada ministériu halo ninia diploma tanba idaidak tenke hatene kontrola dadus ba ninia setór rasik, atu nune’e garante funsionamentu ministériu ida-idak tuir espíritu diploma ministeriál, ne’ebé ita esforsu iha loron hirak ne’e atu tempu badak sei implementa,” governante ne’e informa.
Mekanizmu implementa programa subsídiu kombustível ne’e rasik ho voucher no daudaun Auroridade Nasionál Petróleu no Minerál (ANPM) sei haree.
“Presiza dadus hosi Ministériu Transporte no Komunikasaun no Ministériu Agrikultura no Peska atu prodús voucher. Ekipa téknika agora sei serbisu hela, ita espera loron hirak tuir mai bele halo hotu nune’e ita ezekuta lalais dekretu-lei ne’e,” nia tenik.
ANPM sei identifika estasaun kombustível ne’ebé sei simu voucher ba subsídiu kombustível.
“Empreza sira ne’ebé rejistradu no sertifikadu, ANPM sei buka hela dalan maibé Governu hakarak ne’e hotu tenke kumpre,” Ministru salienta.
Jornalista : Arminda Fonseca
Editora : Julia Chatarina
