DILI, 21 abril 2022 (TATOLI)–Ministériu Edukasaun Juventude no Desportu (MEJD) prevee orsamentu $21.000 ba programa Ensinu Rekorrente atu apoiu nesesidade estudante iha sentru komunitáriu aprendizajen hitu.
“Kada tinan ita sempre tau osan ba sentru komunitáriu aprendizajen atu hala’o atividade, tanba fatin ne’e halibur estudante sira ne’ebé abandona estudu iha pasadu. Ministériu realiza filafali programa hodi apoiu eskola ekivalénsia ne’e rasik. Tanba ne’e kada sentru sei tau osan $3.000,” Diretór Jerál Administrasaun no Finansa MEJD, Antoninho Pires, informa ba Agência Tatoli, iha ninia knaar fatin, Vila Verde, kinta ne’e.
Notísia relevante: Governu Korea sei harii tán sentru komuntária apredizajen iha munsípiu tolu
Iha fatin ketak, Diretór Nasionál Ensinu Rekorrente, José Artur Viana, hateten, orsamentu ne’ebé iha ba nesesidade administrasaun, nune’e labele dependénsia ba proposta ne’ebé haruka mai nasionál.
“Osan sira ne’e atu fasilita prosesu administrasaun iha sentru hanesan komputadór, printer, ka balun falla hanesan tinta laiha, odamatan estraga, bele uza osan ne’e hodi rekupera fasilidade sira atu labele difikulta prosesu ensinu aprendizajen,” nia dehan.
Ministériu estabelese sentru komunitáriu iha Aileu, Bobonaro, Ermera, Baucau, Manufahi, Lautém, Manatuto, Dili no Rejian Administrativa Espesiál Oé-cusse Ambeno (RAEOA).
Pesoál iha sentru komunitáriu aprendizajen rasik mak sei jere orsamentu ba tinan tomak, hafoin aprezenta relatóriu, enkuantu parte Diresaun Nasionál Ensinu Rekorrente (DNER) halo de’it fiskalizasaun bazeia ba proposta ne’ebé aprezenta.
“Diresaun Nasionál Ensinu Rekorrente iha planu iha tempu besik sei konvida mós koordenadór sentru atu tuir formasaun hodi iha koñesimentu no bainhira iha prosesu ezekusaun labele mosu fallansu,” Diretór dehan.
Profesór iha programa ekivalénsia hamutuk 45, ne’ebé kolokasaun iha kada sentru la hanesan, balu iha de’it tolu no seluk bele to’o lima.
“Hosi siklu 1 no 2 ne’ebé loke suku sira ne’e hanaran eskola paralelu no agora sentru hitu koloka ba siklu 3 nian,” nia esplika.
Iha tinan 2021, MEJD kolabora ho United Nations Educational, Scientific and Cultural Organization (UNESCO) kria sentru tolu iha Dili, Covalima no Bobonaro.
Tinan ne’e rejista alunu hamutuk 600 iha Ensinu Rekorrente no daudaun parte DNER prepara hela atu partisipa iha ezame nasionál.
“Ami preokupa ho taxa alunu ne’ebé abandona eskola no seidauk iha kurríkulu ba Ensinu Rekorrente. Ita presiza péritu internasionál atu elabora kurríkulu. Ensinu Rekorrente eziste ona durante tinan-neen, maibé ami sei iha difikuldade,” nia tenik.
Jornalista : Tomé Amado
Editora : Julia Chatarina
