DILI, 21 abríl 2022 (TATOLI)—Xefe Departamentu Administrasaun Finansa iha Sentru Nasionál Formasaun Profisionál (CNFP-sigla portugés) Becora, Pedro de Jesus, informa iha trimestre dahuluk ne’e CNFP Becora ezekuta ona verba Orsamentu Jerál Estadu (OJE) 2022 atinje ona 13%.
“Hosi fulan janeiru to’o 31 marsu ne’e, ami ezekuta ona 13% ne’ebé ekivalente ho osan hamutuk $613,187.00,” Pedro de Jesus informa ba Agência Tatoli, iha nia knar fatin, Becora, Dili, kinta ne’e.
Hosi montante orsamentu $613,187.00 ne’e fahe ba kategória rua (2) ne’ebé kompostu hosi saláriu no vensimentu 20,77% ho nia saldo $112,560.00 no bens servisu 19,16% ho nia saldo 414.887.00.
Iha bens servisu ne’e fahe ba área tolu mak aset management 6,20% ho nia saldo 106.288.00, saláriu ba kontratadu 21,40% ho nia saldo 138.034.00 no formasaun 11,72% ho nia saldo 170,565.00.
Hosi ezekusaun OJE 2022 ne’ebé atinje ona 13% ne’e, CNFP Becora ezekuta ba formasaun dosente, kompra materiál ba administrasaun, halo manutensaun ba ekipamentu iha sentru CNFP Becora no halo mós pagamentu ba funsionáriu permanente no kontratadu sira.
Entretantu, iha portál tranferénsia Orsamentu Jerál Estadu (OJE) 2022, ba Sentru Nasionál Formasaun Profisionál (CNFP-sigla portugés) Becora nia orsamentu 2022 hamutuk $613,187.00 ne’ebé ezekuta ona 16,1%.
Jornalista : Nelia Fernandes
Editór : Cancio Ximenes
