DILI, 21 abríl 2022 (TATOLI)—Primeiru-Ministru, Taur Matan Ruak, informa Governu halo hela preparasaun ba serimónia tomada pose ba Prezidente Repúblika eleitu períodu 2022-2027 ne’ebé sei realiza iha ámbitu komemorasaun loron restaurasaun independénsia 20 maiu 2022 iha Tasi-Tolu, Dili.
Notísia Relevante: PM Taur kongratula Ramos Horta
“Ohin, iha enkontru ko’alia liu kona-ba Governu nia preparativu ba serimónia tomada pose ba Prezidente Repúblika eleitu. Preparasaun la’o hela, Ministéiru Administrasaun Estatál (MAE) mak hala’o iha Tasi-Tolu. Espera katak preparativu la’o di’ak to’o loron tomada pose akontese”, Xefe Governu ba jornalista sira hafoin enkontru semanál ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato Bairru Pite, kinta ne’e.
Governu halo esforsu hotu hodi realiza serimónia tomada pose ba prezidente eleitu, José Ramos Horta, nuudar Prezidente Timor-Leste ba dalimak no komemorasaun loron restaurasaun independénsia ba dala-20 (20 maiu 2022-20 maiu 2022) ne’ebé sei selebra iha 20 maiu 2022.
Primeiru-Ministru, Taur Matan Ruak, hateten kampaña eleisaun prezidensiál 2022 termina ona, agora nia parte fó prioridade hodi foku ba kestaun servisu Nasaun nian.
“Ba ha’u-nia hanoin kampaña hotu tiha ona, agora ita ko’alia hanesan Estadu. Tanba ne’e, preparativu laiha alterasaun, baibain kada tinan lima kuandu Prezidente eleitu ona, Governu sempre halo preparativu sira ba serimónia tomada pose ninian”, nia dehan.
PM seidauk fó sai kona-ba bainaka espesiál sira hosi rai-li’ur atu partisipa iha serimónia toma pose ba Prezidente eleitu maibé iha tempu oin mai bele hatene iha konfirmasaun ruma.
Durante sorumutu, PM Taur Matan Ruak relata mós ba Xefe Estadu kona-ba situasaun seguransa ne’ebé jeralmente la’o hakmatek iha rai laran, durante prosesu kampaña eleitorál segundu volta to’o mai iha eleisaun.
Sekretáriadu Tékniku Administrasaun Eleitorál (STAE) konklui ona apuramentu iha nivél nasionál hafoin kontajen nível munisipál no diáspora iha loron 20 abríl 2022 hatudu katak kandidatu Prezidente Repúblika ho númeru sorteiu ida (1), José Ramos Horta, ho votu 397,145 (62,09%) no kandidatu ho númeru sorteiu rua (2), Francisco Guterres Lú Olo, ho votu 242,440 (37,91%).
Hafoin konklui apuramentu nivel nasionál iha kuarta (20/04) ne’e, STAE haruka kedas rezultadu materiál apuramentu nasionál provizóriu ba Komisaun Nasionál ba Eleisaun (CNE, sigla portugés) hodi verfika no halo apuramentu nasionál iha CNE durante oras 72 molok submete ba Tribunál Rekursu hodi foti desizaun tuir lei eleisaun prezidensiál haruka.
Jornalista : Nelson de Sousa
Editór : Cancio Ximenes
