COVALIMA, ELEISAUN

STAE Covalima transporta ona rezultadu apuramentu ba nasionál

STAE Covalima transporta ona rezultadu apuramentu ba nasionál

Hafoin finaliza apuramentu munisipál, STAE Covalima transporta ona materiál sensitivu ba nasional. Imajen Tatoli/Celestina Teles.

COVALIMA, 21 abril 2022 (TATOLI)–Sekretáriadu Tékniku Administrasaun Eleitorál (STAE) Covalima transporta ona materiál sensitivu ba nasionál hafoin finaliza apuramentu munisipál ba eleisaun prezidensiál segunda volta.

Notísia Relevante: CNE: apuramentu nasionál sei hahú aban

Antes atu transporta materiál sensitivu, STAE asina termu entrega ba Komisaun Nasionál Eleisaun (CNE-Sigla Portugués) ne’ebé asina mós hosi komandante PNTL munisípiu Covalima, Superintendente Basilio de Jesus no fiskál sira hosi kandidatu prezidente repúblika na’in-rua.

Hafoin finaliza apuramentu munisipál, STAE Covalima transporta ona materiál sensitivu ba nasional. Imajen Tatoli/Celestina Teles.

“Hahú realiza eleisaun prezidensiál segunda volta to’o finaliza apuramentu munisipál, ohin (kinta 21/04), ita asina termu entrega hafoin ita bele transporta ona materiál sensitivu ba iha nasionál,” Diretór STAE Covalima, Francisco Gusmão hato’o liuhosi nia diskursu iha salaun STAE, Kampung Baru, Covalima, kinta ne’e.

Prosesu transportasaun materiál eleisaun ne’e ba nasionál akompaña hosi funsionáriu STAE Covalima, Komisaun Nasionál Eleisaun (CNE-Silga Portugués no hetan seguransa hosi Polisía Nasionál Timor-Leste

Diretór CNE Covalima, Hermengildo de Sena, lori komisariu nia naran hato’o agradese ba entidade hotu nia kontribuisaun tanba eleisaun prezidensiál segunda volta ne’e la’o ho susesu.

“Eleisaun segunda volta ne’e la’o ho di’ak, tanba ne’e lori komisariu CNE nia naran hato’o agradese ba autoridade no entidade hotu-hotu ne’ebé kontribui tebes, tanba STAE ho CNE mesak karik eleisaun sei la hetan susesu hanesan ita-nia hakarak,” nia dehan.

Komandante Polísia Nasionál Timor-Leste (PNTL) munisípiu Covalima, Superintendente Basilio de Jesus, garante katak hosi parte seguransa preparadu atu asegura hodi transporta materiál sensitivu ba iha nasionál.

“Ohin ita tama ona tempu transporta materiál sensitivu ba nasionál. Kona-ba seguransa, ami preparadu no garante atu asegura materiál to’o iha nasionál, tanba atu akompaña materiál sensitivu ba nasionál ne’e iha seguransa nia liman,” nia hateten.

Eleisaun segunda volta iha Covalima kontroladu

Entretantu, Komandante Polísia Nasionál Timor-Leste (PNTL) munisípiu Covalima ne’e informa, durante realiza eleisaun prezidensiál segunda volta iha munisípiu Covalima ne’e situasaun seguransa kontroladu.

“Seguransa mai hosi komponente hotu ne’ebé envolve atividade eleisaun iha baze, fó ita-nia kontribuisaun ba ita-nia seguransa la’ós hosi polísia de’it maibé seguransa kontroladu no la’o di’ak tebes. Ida-ne’e hatudu katak prosesu eleisaun ne’e la’o ho di’ak,” Komandante PNTL Covalima ne’e hateten liuhosi nia diskursu iha salaun STAE Covalima, Kampung Baru, kinta ne’e.

Hafoin realiza eleisaun prezidensiál tinan ida-ne’e, iha tinan oin (2023) mai, povu Timor-Leste sei hasoru eleisaun parlamentár tanba ne’e tenke mantein hahalok di’ak hodi bele halo susesu dala ida tan ba eleisaun parlamentár ne’ebé atu mai,

Entertantu, membru Polisía Nasionál Timor-Leste (PNTL) iha munisípiu Covalima hamutuk na’in-158 ne’ebé reforsa mós hosi Unidade Polisía Fronteira (UPF) na’in-35, Unidade Espesiál na’in-10, Unidade Maritima na’in-neen (6), apoiu hosi komandu jerál na’in-14 hodi destaka ba iha sentru votasaun sira iha Covalima.

Dadus hosi STAE hatudu, sentru votasaun iha munisípiu Covalima hamutuk 80 ho estasaun votasaun 92 ho totál brigada hamutuk na’in-80, poling-staff 920 ne’ebé akompaña hosi ofisiál CNE hamutuk na’in-103.

Notísia Relevante: Ramos Horta lidera kontajen votu iha Covalima ho 68,89%

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!