DILI, 20 abríl 2022 (TATOLI)-Diretór Jerál STAE, Acilino Manuel Branco, kongratula povu Timor-Leste tanba ezerse ona sira-nia diretu hodi partisipa iha eleisaun prezidensiál periodu 2022-2027 hahú husi primeira volta to’o segunda volta.
Alende ne’e, Sekretariadu tékniku administrasaun eleitorál (STAE) liuhosi ninia diretór jerál ne’e mós kongratula entidade hotu-hotu ne’ebé maka fó ona kontribuisaun hodi fó susesu ba eleisaun prezidensiál iha tinan 2022 tanba la’o iha ámbitu paz no trankuilidade.
Notísia Relevantes :Hetan votu maioria iha Elpres, Espoza PM kongratula José Ramos Horta
“Parabens mós ba funsionáriu tomak STAE nian, fiskais, Komisaun Nasionál Eleisaun, observadór nasionál no internasionál, mídia imprime no online, PNTL no institusaun relevante sira ne,ebé durante ne,e suporta maka’as ba STAE, hodi servisu hamutuk ho ida-idak nia funsaun ba prosesu eleisaun prezidensiál 2022, komesa husi eleisaun prezidensiál primeira ronde to’o segunda ronde ho susesu,”nia dehan iha STAE Caicoli Dili kuarta ne’e.
Nia hateten ho kontribuisaun husi parte hotu-nian, maka STAE konsege realiza eleisaun prezidensiál hahú husi primeira ronde iha fulan-marsu 2022 to’o segunda volta ne’e ho susesu.
Observadór internasionál husi Komunidade koa’lia lian portugés (CPLP-sigla portugés) no Observadór husi União Europea mós públika ona sira-nia relatóriu observasaun ne’ebé hateten eleisaun la’o ho transparansia, seguru, livre no iha estabilidade nia laran.
“STAE no CNE mós hetan apresiasaun husi observadór internasionál hanesan União Europeia, CPLP no seluk seluk tan, ida ne,e hanesan susesu boot ida ba ita, hodi kontinua servisu di’ak liután ho entidadade hotu-hotu iha eleisasaun sira ne’ebe tuirmai,’’ Acilino Branco dehan.
Diretór jerál STAE, Acilino Manuel Branco, ofisialmente, deklara rezultadu provizóriu apuramentu nasionál ba eleisaun prezidente repúblika segunda volta husi munisípiu 12 inklui Rejiaun Autónoma Espesiál Oé-cusse Ambeno (RAEOA) no diaspora iha loron kuarta, oras 18:00 iha edifísiu STAE nasionál, Caicoli, Dili.
Iha apuramentu nasionál, STAE konklui kandidatu prezidente ho númeru sorteiu ida (1), José Ramos Horta ho votu 397.145 votu (62.09 %) no kandidatu ho númeru sorteiu rua (2), Francisco Guterres ‘Lú Olo’ ho votu 242.440 (37.91 %). Ho nune’e responsiblidade husi STAE determina ona.
Notísia Relevantes :Ramos Horta agradese ba povu nia konfiansa
Jornalista : Camilio de Sousa
Editór : Agapito dos Santos
