DILI, 21 abríl 2022 (TATOLI)— Tribunál Rekusu (TR), kinta ne’e, admite Os Verdes de Timor sai ona partidu politiku foun iha Timor-Leste tanba kumpre ona rekezitu lei partidu polítiku.
TR admite Os Verdes de Timor tanba iha faze verifikasaun dokumentu inskrisaun kumpre ona Lei partidu polítiku iha artigu 13, lei númeru 3/2004, 14 abríl, no alterasaun dahuluk ne’ebé introdús iha lei númeru 2/2016, 3 fevereiru.
Notísia relevante: Prenxe ona rekizitu, MJ aprova pedidu inskrisaun Os Verdes de Timor
Prezidente Tribunál Rekursu, Deolindo dos Santos, hateten hafoin simu dokumentu hosi Ministériu Justisa, hahú kedan halo verifikasaun ba dokumentu ho bazeia ba lei partidu politiku nian.
“Tribunál Rekursu, ohin, admite atu partidu Os Verdes de Timor rejistu provizoriamente hanesan partidu politiku,” Prezidente Tribunál Rekursu, Deolindo dos Santos, hateten ba jornalista sira hafoin partisipa seremonia pose ba ofisiál Ministériu Públiku nain-21, iha salaun auditoria Ministériu Justisa Caicoli, kinta ne’e.
Prezidente TR dehan laiha prazu rejistu provizóriu ba Os Verdes de Timor hanesan partidu polítiku foun iha Timor-Leste tanba tanba he’in publikasaun iha rádiu nasionál, hanesan kritéria ida ne’ebé impoin iha artigu 15, númeru 2 refere iha lei 3/2004.
Tanba tuir lei partidu politiku katak partidu ida atu hetan legalidade hanesan partidu tenke halo inkrisaun liu hosi Ministériu Justisa atu fó aseitasaun mak submete dokumentu partidu refere, ba Tribunál Rekursu atu haree.
Nune’e, Prezidente Deolindo dehan Tribunál Rekursu molok atu rejistu definitivu ba kandidatu partidu ida hodi sai partidu polítiku tenke liuhosi rejistu provizóriu, hafoin públika ona iha rádiu, hafoin TR deside atu rejistu definitive hanesan partidu politiku ida.
“Hafoin publikasaun iha rádiu mak Tribunál Rekursu sei haree fila-fali atu deside rejistu definitivamente ba Os Verdes de Timor sai partidu ne’ebé bele konkorre iha kualkér eleisaun iha tempu oin,” Prezidente Deolindo afirma.
Iha loron 05 abríl, Ministériu Justisa (MJ), liuhosi Diresaun Nasionál Jerál Rejistu aprova pedidu inskrisaun kandidatu partidu polítiku Os Verdes de Timor tanba kumpre rekizitu ba inskrisaun ho apoiante 20.000.
Tuir lejizlasaun, hafoin Ministériu Justisa halo autentikasaun no aprova pedidu kandidatu partidu polítiku ne’e iha prazu loron rua nia-laran, haruka dokumentu hotu partidu Os Verdes ba iha Tribunál Rekursu atu hetan legalidade.
Molok ne’e, Ministru Justisa sesante Manuel Cárceres indefere diretamente inskrisaun kandidatu partidu Os Verdes de Timor iha loron 11 juñu 2021 no iha fulan-fevereiru 2022.
Notísia relevante: Ministru Justisa indefere direitamente kandidatu partidu Os Verdes
Jornalista: Natalino Costa
Editór : Florencio Miranda Ximenes
