DILI, 23 abríl 2022 (TATOLI)–Komisaun Nasionál ba Eleisaun (CNE, sigla portugés) konklui ona verifikasaun ba votu nulu no votu reklamadu husi munisípiu sia mak hanesan Aileu, Ainaru, Baukau, Bobonaru, Kovalima, Dili, Ermera, Lautein no Likisá.
“Ko’alia kona-ba kada kandidatu nain rua hetan votu válidu hira hafoin apuramentu nasionál ba munisípiu sia sei prosesu hela, ami labele fó sai agora tanba bainhira verifikasaun ba munisípiu haat seluk, no diaspora hotu, ona mak ami bele fó sai”, Komisária CNE, Odete Maria Belo, ba TATOLI iha salaun Larigutu CNE, ohin.
Nia relata CNE sei kontinua halo apuramentu ba votu nulu no votu reklamadu husi munisípiu Manufahi, Manatutu, Vikeke no RAEOA, inklui diaspora hanesan Reinu Unidu, Korea Súl, Portugál no Austrália.
“Urna husi Reinu Unidu, Portugál, Korea Súl sei to’o iha Timor-Leste iha 24 abríl depois ita kontinua halo apuramentu”, Komisaria Odete informa.
Nia hateten, husi sentru votasaun 1.200, CNE simu votu nulu hamtuk 5.048 no votu reklamadu hamutuk 277.
“Aban ita konklui ona verifikasaun ba votu nulu no votu reklamadu tuir prazu 72 oras ne’ebe mak ita iha”, akresenta.
Hafoin termina prosesu verifikasaun no apuramentu nasionál, CNE sei iha 72 oras atu elabora akta ne’ebé mak sei aprezenta ba Tribunál Rekursu.
“Nune’e ami hein, karik laiha ema ruma mak mai hato’o rekursu ruma, entaun ami bele entrega akta refere ba Tribunál Rekursu iha loron 27 ka 28 fulan ne’e”, nia esplika.
Notísia relevante: Aban, akta eleitorál diáspora to’o TL no CNE konklui munisípiu neen
Jornalista : Felicidade Ximenes
Editora : Rita Almeida
