BOBONARO, 24 abril 2022 (TATOLI)–Institutu Jestaun Ekipamentu, Institutu Públiku (IGE, I.P sigla portugués) sei hadi’a urjente dalan antigu iha suku tolu iha postu administrativu Bobonaro.
Xefe ekipa IGE, I.P munisípiu Bobonaro, Costódio Pereira, hateten, inisiativa ne’e bazeia ba pedidu Autoridade lokál ba institutu iha nasionál ba suku Ai-Assa, Molop no Sibuni, ne’ebé hetan aprovasaun hosi Ministériu Obra Públika (MOP) atu rezolve imediata tanba durante ne’e difikulta movimentu transporte no komunidade lokál, liu-liu iha tempu udan.
“Ami simu ona pedidu atu fó prioridade hadi’a dalan iha suku Ai-asa, iha aldeia Malop no Sibuni, tanba ne’e agora ami sei tau prioridade iha tempu badak hadi’a estrada tuan sira iha suku tolu ne’e tanba kareta labele liu, ami aterru ida hosi Bobonaro ba aldeia Mazop iha suku Ai-Assa porvolta kilómetru lima, ba fali suku Sibuni kilómetru 20,” Xefe ekipa IGE, I.P informa ba Agência Tatoli, foin lalais ne’e, iha Maliana.
Notísia relevante: IGE normaliza ona fatin estragu tolu iha Bobonaro
Tamba ne’e, responsávél ekipa husu ba Autoridade lokál inklui komunidade atu koopera serbisu ho ekipa halo intervensaun emerjénsia iha terrenu hodi aselera serbisu, nune’e tempu badak komunidade bele asesu dalan ho di’ak.
“Ami agora sei rezolve hela estrada iha área Galisapulu, iha suku Lahomea, postu administrativu Maliana, hafoin ida-ne’e hotu ona ami sei muda ba suku tolu hanesan Ai-Assa, Molop no Sibuni ne’ebé ami simu ona pedidu hosi nasionál,” nia akresenta.
Hahú hosi fevereiru tinan ne’e, IGE, I.P normaliza ona fatin estragu tolu tanba impaktu dezastre naturál hanesan rai-monu taka metin estrada dirasaun hosi Maliana bá kapitál Dili iha área Manuten-dodok, suku Leolima no estrada ida iha área Fatuk Kaka, postu administrativu Balibo liga ba fronteira Batugade inklui estrada kotu iha suku Oeleu, postu administrativu Bobonaro, ne’ebé liga direitamente bá munisípiu Covalima.
Notísia relevante: Xefe suku Leo-lima husu IGE normaliza estrada Balibo-Maliana
Maski nune’e, IGE, I.P daudaun ne’e provizóriu sei foka normaliza estrada iha Bobonaro, enkuantu ponte Bilimau liga hosi postu administrativu Cailaco, munisípiu Bobonaro bá postu administrativu Hatulia, munisípiu Ermera sei rezolve inisíu fulan-jullu nia laran tamba daudaun ne’e volume bee mota sei maka’as.
Daudaun ne’e ekipamentu pezadu ne’ebé IGE, I.P destaka iha terrenu atu responde pedidu hosi komunidade mak hanesan Buldozer ida, Eskavatór modelu 130 rua, Loader ida, Kamioneta tolu no tanki mina ida.
“Maibé ekipamentu hirak ne’e presiza halo manutensaun rutina tamba halo operasaun kuaze tinan barak ona,” nia sujere.
Jornalista : Sérgio da Cruz
Editora : Julia Chatarina
