iklan

EKONOMIA, HEADLINE

Governu koordena mekanizmu implementasaun subsídiu kombustível ho entidade envolvidu

Governu koordena mekanizmu implementasaun subsídiu kombustível ho entidade envolvidu

Estasaun kombustível iha Dili. Imajen Tatoli/Egas Cristóvão

DILI, 25 abril 2022 (TATOLI)—Governu liuhosi Ministériu Petróleu no Minerál (MPM) hamutuk ho Autoridade Nasionál Petróleu no Minerál, segunda ne’e, koordena mekanizmu implementasaun subsídiu kombustível ba oporadór transporte rodaviáriu, aereu no marrítima, inklui operadór postu kombustível 59 ne’ebé iha lisensa.

Kestaun ne’e liga ho dekretu-lei númeru 18/2022 kona-ba atribuisaun subsídiu kombustível ba operadór transporte rodoviáriu públiku, transporte aéreu no marrítimu nasionál, inklui adkirente kombustível destinadu ba atividade agríkola no piskatória, ne’ebé tempu badak Governu sei implementa.

“Enkontru ohin atu disemina no buka informasaun hosi operadór ka postu estabelesimentu, oinsá bele elebora di’ak ami-nia mekanizmu atu implementa dekretu-lei númeru 18/2022 kona-ba subsídiu ba oporadór transporte rodaviáriu, aéreu no marrítima,” Diretór Diresaun Downstream ANPM, Nelson de Jesus, hateten, iha Suai Room, Timor Plaza.

Notísia relevante: Estasaun hotu simu troka voucher subsídiu kombustível ba transporte públiku 

Bazeia ba peskiza ne’ebé ANPM halo, folin gazolina normál $1,08 maibé daudaun sa’e ba $1,35, ho nune’e mekanizmu fahe subsídiu kombustível maka kada benefisiáriu lori voucher ba estasaun kombustível no tuir selu presu normál $1,08, enkuantu restu Governu mak selu hanesan subsídiu.

“Tanba voucher ne’e postu abastamentu sira sei lori fali ANPM hodi halo kalkulasaun ho dadus ne’ebé ami iha, hafoin haruka ba ministériu sira ne’ebé emite voucher, nune’e ministériu bele selu ba postu abastamentu kombustível sira,” Diretór akresenta.

Iha implementasaun dekretu-lei ne’e, ANPM nia knaar mak halo verifikasaun no rekolla postu abastamentu kombustível sira-nia dadus loron-loron, nune’e to’o loron implementasaun bele selu ho justu.

Ba kestaun ne’e, ANPM hamutuk ho Ministériu Agrikultór no Peska (MAP) no Ministériu Transporte no Komunikasaun (MTK) simu dadus atu uza presu ida de’it iha estasaun kombustível hotu no sei introdús iha diploma ministeriál hodi sai baze legál.

“Transporte rodoviáriu sira ne’ebé sei hetan voucher sei hakarek númeru plat kada transporte, hafoin enxe mina no ba sira seluk hanesan aéreu no marrítima ita sei tau hotu risku, ne’ebé sei la bosok estasaun kombustível sira,” nia esplika.

Iha biban hanesan, Diretór Irmão Timor Fuel hosi Rejiaun Administrativa Espesiál Oé-cusse Ambeno (RAEOA), Julio Mak, konsidera inisiativa ne’e di’ak tanba bele ajuda povu sira maibé iha difikuldade oituan tanba ne’e presiza iha koordenasaun.

“Ami-nia difikuldade mak transporta kombustível hosi Dili bá Oé-cusse liuhosi tasi, daudaun ne’e folin karun tebes, uluk ami tula tonelada 70 hosi Dili bá Oé-cusse ho kustu $9.000, maibé agora sa’e ba $20.000. Entaun ami fa’an fali ne’e bele to’o $2, maibé Governu fasilita ami liu terrestre ne’e di’ak,” nia dehan.

Daudaun ne’e, presu kombustível ne’ebé fa’an kombustível iha Oé-cusse, gazoleu $1,55 no gazolina $1,45.

Atividade diseminasaun dekretu-lei ne’e partisipa mós hosi Ministru Petróleu no Minerál, Víctor da Conceição Soares, Ministru Transporte no Komunikasaun, José Agostinho da Silva, inklui Diretór no tékniku sira hosi ministériu no ANPM.

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!