DILI, 26 abril 2022 (TATOLI)–Governu liuhosi Ministériu Finansa (MF) realiza jornada plenamentu hodi identifika medida prinsipál sira ba Orsamentu Jerál Estadu (OJE) 2023.
Ministru Finansa, Rui Augusto Gomes, hateten jornada planeamentu ho tema ‘Mai ita hamutuk identifika medida prinsipál ba OJE 2023 hodi rekupera ita-nia ekonomia, no promove kresimentu ne’ebé inkluzivu no sustentavel’, hanesan jornada ba dahuluk ne’ebé halo iha istória desde restaura indepedénsia iha tinan 20 liubá.
“Tema ida-ne’e importante tebes ba ita hotu, tanba ita presiza diskute no identifika medida prinsipál ba OJE 2023, ho objetivu atu rekupera ita-nia ekonomia no promove kresimentu ekonómiku, ne’ebé sustentável no inkluzivu,” Ministru informa iha ámbitu sesaun traballu ne’ebé hala’o iha auditorium MF, Aitarak-laran, tersa ne’e.
Notísia relevante: Governu fó prioridade programa neen iha OJE 2022
Medida sira ne’ebé aprezenta mai hosi preparasaun intensivu ida iha fulan-ida ho balun-nia laran, ne’ebé envolve rekolla medida setoriál sira no konsultasaun téknika ho entidade tomak ne’ebé hola parte iha perímetru orsamentál.
“Ministériu Finansa halo analiza ba lista medida ne’ebé mai hosi entidade tomak hodi asegura katak medida hirak ne’e aliña ona ho planu estratéjiku dezenvolvimentu, programa VIII Governu Konstitusionál, planu estratéjiku setoriál, planu rekuperasaun ekonómika no dokumentu estratéjiku seluk ne’ebé aprova ona, ikus liu halo aliñamentu ba rezultadu nasionál ne’ebé dezenvolve dahuluk hosi Ajénsia Nasionál Planeamentu, Monitotizasaun no Avaliasaun (ANAPMA),” nia esplika.
Bazeia ba analiza ne’e maka Ministériu Finansa kualifika ona medida lubuk ida ne’ebé hatúr tuir sub-setór Planu Estrajéjiku Dezenvolvimentu.
Atividade ne’ebé hala’o durante loron-ida tomak loke hosi Primeiru-Ministru, Taur Matan Ruak, no partisipa hosi membru VIII Governu, kargu xefia administrasaun Estadu, Prezidente Autoridade no Administradór munisipál sira.
Jornalista : Antónia Gusmão
Editora : Julia Chatarina
