DILI, 26 abril 2022 (TATOLI)–Ministériu Ensinu Superior Siénsia no Kultura (MESSK) planeia atu inisia estájiu profisionál ba estudante finalista non bolseiru hosi universidade rai-laran no rai-li’ur ne’ebé kualifikadu atu hala’o prátika iha instituisaun sira.
Ministru Ensinu Superior Siénsia no Kultura, Longuinhos dos Santos, hateten, iha orsamentu retifikativu, nia sei propoin kestaun ne’e, nune’e finalista sira bele iha aportunidade apreende iha instituisaun sira no bainhira iha dezempeñu di’ak, instituisaun sira bele rekruta.
“Ita kria planu ne’e tanba durante ne’e kuaze estudante finalista ho kualifikasaun di’ak iha universidade rai-laran no rai-li’ur hetan de’it maka teoria. Tanba ne’e, ita tenke promove sira atu apreende prátika iha instituisaun sira, ida-ne’e maka agora iha hela faze diskusaun,” Ministru Longuinhos hateten ba Agência Tatoli, iha resintu edifísiu Ministériu Finansa, Aitarak Laran, tersa ne’e.
Tuir Ministru, inisiativa ne’e hodi estudante finalista kualifikadu bele hetan promosaun, tanba durante ne’e Governu fó liu atensaun ba estudante bolseiru sira.
“Ezemplu ida maka programa hosi Fundu Dezenvolvimentu Kapitál Umanu (FDCH, sigla portugés) ba estudante bolseiru sira, bainhira termina estudu sei hetan uluk estájiu profisionál iha instituisaun no sei hetan promosaun,” nia akresenta.
Notísia relevante: FDCH fó ona bolsa estudu ba timor-oan 6.401 durante tinan-sia
Ho nune’e, governante ne’e konfesa katak MESSK nia planu atu fó liu ba estudante ein jerál (non bolseiru) sira, maibé foka liu ba estudante ne’ebé iha kualifikasaun di’ak maka bele hetan oportunidade hala’o estájiu profisionál iha instituisaun sira.
“Ita-nia planu atu promove estudante hotu iha rai-laran no rai-li’ur, ne’ebé finalista ho kualifikasaun di’ak. Kuandu sira hatudu kapasidade iha tempu estájiu nia laran ho kualidade konserteza instituisaun sei promove sira, maibé ida-ne’e ita foin maka planu hela seidauk serteza,” nia tenik.
Jornalista : Tomé Amado
Editora : Julia Chatarina
