DILI, 26 abril 2022 (TATOLI)—Ministériu Negósiu Estranjeiru no Kooperasaun (MNEK) daudaun ne’e hein hela desizaun hosi orgaun soberanu sira hodi konvida bainaka importante hosi rai-li’ur atu partisipa restaurasaun loron Indepedénsia Timor-Leste 20 maiu ba da-XX.
“Daudaun ne’e ministériu hein hela desizaun hosi Primeiru-Ministru no Prezidente Repúblika hodi deside naran bainaka hira ne’ebé atu mai, nune’e sira asina hotu ona konvite mak ami prontu distribui ba ita-nia bainaka,” Ministra Negósiu Estranjeiru no Kooperasaun, Adaljiza Albertina Xavier Reis Magno, hateten ba Agência Tatoli, iha resintu Ministériu Finansa, Aitarak-laran, tersa ne’e.
Notísia relevante: Diplomata membru ASEAN kongratula Ramos Horta
Iha loron 20 maiu 2022, aleinde komemora restaurasaun indepedénsia iha mós seremónia tomada pose ba Prezidente Repúblika eleitu foun períodu 2022-2027, José Ramos Horta.
Desde novembru tinan kotuk iha informasaun katak Prezidente Repúblika Portugal, Marcelo Rebelo de Sousa, sei partisipa loron restaurasaun independénsia no iha tempu hanesan halo vizita Estadu.
“Loron hirak ba oin ita sei hatene bainaka hira mak atu mai, maibé lidér sira iha nasaun viziñu sira sai prioridade atu partisipa iha seremónia ne’e,” nia akresenta.
Antes ne’e, Prezidente Repúblika eleitu, José Ramos Horta, hateten, nia parte hetan ona kontaktu katak iha líder nasaun balun mak sei partisipa loron 20 maiu.
Horta simu mensajen felisitasaun no konfirmasaun hosi líder Uni Emirat Arab (UEA), Eropa, Franca, Portugál, Áfrika, Nigeria, Austrália, Tailándia, Singapura, Nepal, no seluk tan kona-ba delegadu sira ne’ebé sei partisipa iha loron boot ne’e.
Jornalista : Arminda Fonseca
Editora : Julia Chatarina
