DILI, 26 abril 2022 (TATOLI)—Primeiru-Ministru (PM), Taur Matan Ruak, akompaña hosi Reprezentante Programa Ai-han Mundiál (WFP, sigla inglés) iha Timor-Leste, Dageng Liu no Sekretariadu Scaling Up Nutrition (SUN) Moviment Timor-Leste, Filipe da Costa, foin lalais ne’e, halo vizita ba munisípiu Ermera hodi observa progresu serbisu grupu kriativu tolu.
Grupu kreativu tolu ne’ebé hetan vizita hodi PM no ekipa mak hanesan grupu prodús ai-kulat mutin, prodús adubu no ortikultura, ne’ebé antes ne’e hetan apoiu fundu hosi Gabinete Servisu Apoiu Sosiedade Sivil no Auditoria Sosiál (SASCAS, sigla portugés) hosi Gabinete Primeiru-Ministru no WFP.
“Ami mai vizita grupu sira ne’ebé durante ne’e sira apoia. Entaun ohin ami iha grupu ne’ebé manán prémiu dala-tolu ona, bainhira uluk ha’u hanesan Prezidente Repúblika no foin daudaun segundu no terseira lugar, entaun hanesan grupu sira ne’ebé ita bele dehan sai ezemplu no bele fó inspirasaun ba grupu sira seluk iha fatin seluk, bele tuir hosi prinsípiu ita buka serbisu ba ita-nia an rasik no kria rasik serbisu ba ita-nia maluk sira do que ita hein de’it hosi Estadu,” PM hateten hafoin vizita grupu kreativu sira.
Notísia relevante: Movimentu SUN realiza kompetisaun tein ai-han nutritivu lokál
Xefe Ezekutivu konsidera asaun sira hanesan kontribuisaun sidadaun tanba ne’e nia apresia hodi iha inisiativa ba vizita direta.
“Ha’u kontente mai haree sira-nia projetu, ne’ebé bele fó rendimentu, em vez de hosi kafé de’it, bele mós ikan, modo, buah naga no sira seluk hanesan ohin ha’u vizita grupu kulat. Ha’u admira no gosta loos kulat, dalaruma ba sosa iha supermerkadu afinál Ermera iha produsaun kulat ne’ebé maioria prodús hosi joven no ama sira. Ha’u espera katak sira-nia atividade bele sai motivasaun no inspirasaun ba grau sira seluk iha Timór laran,” eis Prezidente Repúblika ne’e dehan.
Xefe Grupu Dezenvolvimentu Ortikultura Rurál, Jerónimo Barreto Soares, kontente ho prezensa PM, ne’ebé fó motivasaun no korajen atu sira bele kontinua hakat liután ba oin.
“Atividade ne’ebé halo mak hanesan ortikultura, hakiak ikan, pekuária, prezerva ai-lokál, no halo mitigasaun hodi hatan ba mudansa klimátika,” nian tenik.
Nune’e mós, Xefe Grupu Ermera Ai-kulat mutin, Januário Goncalves, hateten, grupu ne’e harii iha tinan 2018 ne’ebé mai hosi inisiativa rasik tanba haree ba dezempregu no má nutrisaun a’as iha Timor-Leste.
“Ami haree hanesan ami na’in hira iha rekursu oituan no ami iha koñimentu siénsia uitoan. Ami apreende hosi East Timor Coffee Institute hodi halo produsaun ba ai-kulit mutin hodi redús ma nutrisaun no iha tempu hanesan beleredús dezempregu iha Ermera,” Januário dehan.
Jornalista : Antónia Gusmão
Editora : Julia Chatarina
