Progresu reabilitasaun eskola 16 iha Covalima atinje ona 25%
COVALIMA, 26 abril 2022 (TATOLI)—Diretór Servisu Edukasaun Covalima, Rui Suni Seran informa, konstrusaun no reabilitasaun eskola sira iha Covalima liuhosi projetu komunitária progresu implementasaun atinje ona 25%.
Notísia Relevante: Infografia: Grupu komunitáriu sei reabilita eskola 15 iha Covalima
“Implementasaun projetu komunitária hodi konstrui no reabilita eskola 16 iha Covalima atinje ona 25%, tanba grupu komunitária sira foti osan ho fazeadamente,” Diretór Servisu Edukasaun Covalima, Rui Suni Seran, hateten ba Agência Tatoli iha nia knar fatin, Santa Rosa, Covalima, tersa ne’e.
Implementasaun projetu komunitária ne’e osan transfere direta ba ida-idak nia konta bankaria hodi halo jestaun.
Enkuantu, Projetu komunitária ne’e ho nia durasaun tempu hamutuk fulan neen (6) no grupu komunitáriu sira-ne’e asina ona kontratu ho ministériu relevante iha tinan 2021.
Implmentasaun projetu komunitária ne’e utiliza orsamentu jerál estadu 2021 iha munisípiu Covalima, sei rehabilita eskola hamutuk 16 ne’ebè implementasaun atinje ona 25%.
Konstrusaun no reabilitasaun eskola sira iha munisípiu Covalima mak hanesan Eskola Bázika Filiál (EBF) sira iha Zumalai ho orsamentu $160,823,28, Usecai $109,981.83, Has-ain $69,614.12, Soidiga $101,608.76, Holbolu $72,561.80, Maucola $65,448.21, Salasa $110.004.78, Pre-eskolar Akar laran $102,402.01.
Eskola Bázika Filiál (EBF) Laen-Tolu $128,627.66, Eskola Sekundáriu Jerál Suai $103,904.22, Eskola bázika Filiál (EBF) Traducama $115,378.76, Eskola Bázika Filiál (EBF) Ai-Toos $109,418.63, Eskola Bázika Filiál (EBF) Macocon $75,543.07, Eskola Tékniku Vokasionál Fohorem $112,263.37, Eskola Bázika Filiál (EBF) Fatumea $174,877.75 no pré-eskolár Busacucun $112,750.45.
Antes ne’e, iha loron 07 fulan-outubru 2021, Vise-Ministru Edukasaun asina kontratu ho grupu komunitária 15 ne’ebé atu reabilita no konstrui eskola 15 mai hosi OJE 2021 ne’ebé prevee iha transferénsia públika, grande projetu mai hosi rubrika fundu infrestrutura nian no konstrui eskola KAFE haat (4).
Jornalista : Celestina Teles
Editór : Cancio Ximenes
