BOBONARO, 27 abríl 2022 (TATOLI) – Sekretáriu Autoridade Munisípiu Bobonaro, João de Fátima do Carmo, hateten tinan ne’e autoridade munisipál prevee osamentu rihun $10 hodi komemora loron restaurasaun independénsia 20 maiu ba dala-XX.
Montante orsamentu ba planu asaun anuál tinan fiskál 2021 nian ho totál rihun $46,500 atu aloka ba eventu importantes sira iha 2022 hanesan proklamasaun independénsia 28 novembru no eventu importante seluk.
“Tinan ne’e iha orsamentu ba restaurasaun Independénsia nian hamutuk $10 mill, maibé montante ne’e ita sei aloka mós ba iha administrasaun postu, idak-idak sei hetan rihun $1.500, osan ne’e inklui mobilizasaun komunidade no atividade ne’ebé sei realiza iha postu administrativu sira,” nia informa ba jornalista sira, iha kna’ar-fatin, kuarta ne’e.
Atu halo jestaun ba orsamentu ne’e mak, tersa ne’e Prezidente Autoridade Munisípiu Bobonaro Ernesto de Oliveira Barreto, realiza enkontru preparasaun ho kargu xefia sira hosi liña minteriál no diretór delegasaun territoriál, administrador postu sira,s eguransa kompostu hosi komandu PNTLmunisípiu no F-FDTL destakamentu postu Tunubibi atu forma komisaun eventuál ba selebrasaun loron importante ne’e.
Nune’e rezultadu hosi enkontru ne’e partisipante sira deside hamutuk apoia Lúcio Dinis Marques ‘Onsar’ atuál Vise-Prezidente Konsellu Veteranu Munisípiu Bobonaro mak sai Prezidente Komisaun Organizadora ba komemorasaun 20 maiu ho nia Vise mak João de Fátima do Carmo atuál Sekretáriu Autoridade Munisípiu Bobonaro.
“Rezultadu enkontru ida ohin mak ita forma ona komisaun, ita sei enkontru iha loron 03 fulan oin, atu nune’e kada seksaun idak-idak bele aprezenta ona ninia planu ka mapeamentu relasaun ho atividades saida maka ita sei hala’o,” nia hateten.
Tuir planu serimónia komemorasaun 20 maiu nível munisípiu Bobonaro sei realiza hasa’e Bandeira iha Kampu Futeból Maliana ho atividade parada hosi estudante sira, envolve membru PNTL, F-FDTL no sei iha mós konsertu ba dame.
“Konsertu ne’e atu ema hotu-hotu bele sente katak foin daudaun iha períodu eleisaun volta dahuuk no volta daruak, depois iha mós kampaña halo ema nia kakutak dalaruma manas oituan, entaun ho konsertu ne’e ita bele hamenus tiha ema-nia tensaun sira-ne’e,” nia akresenta.
Jornalista : Sérgio da Cruz
Editór : Evaristo Soares Martins
