iklan

EKONOMIA, HEADLINE, IMAJEN, INKLUZAUN SOSIÁL, LAUTEIN, MUNISÍPIU

Ema na’in-sia hosi Leuro sei hetan Uma Kbiit Laek

Ema na’in-sia hosi Leuro sei hetan Uma Kbiit Laek

Xefe suku Leuro, postu administrativu Lospalos, munisípiu Lautém. Carlito Viegás. Imajen Tatoli/Natalino Belo.

LAUTÉM, 27 abríl 2022 (TATOLI) – Autoridade suku Leuro, postu admistrativu Lospalos, munisípiu Lautém aprova ema na’in-sia mak sai benefisiáriu ba subsídiu konstrusaun Uma Kbiit Laek (UKL) iha tinan ne’e.

Xefe Suku Leuro, Carlito Viegas hateten, liuhosi enkontru konsellu suku deside benefisiáriu na’in-sia kompostu hosi inan faluk uma-kain tolu, vulnerável no defisiente mak prenxe kritéria atu hetan subsídiu UKL ba tinan 2022.

“Ita identifika no prosesu remata ona, hein halo kotasaun ba kompañia antes realiza konstrusaun,” Xefe suku Leuro informa  ba Tatoli iha Souro, tersa ne’e.

Hosi benefisiáriu na’in-sia ne’e iha direitu ba UKL ho medida 48 metru kuadradu ne’ebé sei aloka orsamentu ba kada uma hamutuk $ 17.000 nune’e tótal hamutuk $ 153.000.

“Ha’u agradese tanba programa ne’e benefísia duni ba ita-nia ema kbiit laek iha suku Leuro,” Carlito akresenta.

Suku Leuro iha aldeia haat kompostu hosi Leuro, Luturula, Soro Moco, Tcharanoho ho  tótal populasaun hamutuk 812.

Administrasaun munisípiu Lautém hetan alokasaun orsamentu husi Programa UKL hamutuk rihun $742. Hosi totál ne’e atu finansia atividade fíziku hamutuk rihun $714 ba suku 14 no operasionál rihun $28.

Jornalista   : Natalino Belo

Editór         : Evaristo Soares Martins

iklan
iklan

Leave a Reply

iklan
error: Content is protected !!