VIQUEQUE, 27 abril 2022 (TATOLI)—Ekipa saúde postu Viqueque Villa kontinua fó vasina ba estudante idade 12 to’o 17 no daudaun rejista estudante hamutuk 13.000 simu ona vasina Pfizer.
“Estudante hirak ne’e hosi eskola hamutuk 30. Ekipa saúde sira sei esforsu halo advokasia ho profesór sira atu mobiliza estudante sira simu vasina Pfizer no koordena inan-aman akompaña estudante sira hodi hetan vasinasaun,” Xefe Sentru Saúde postu Viqueque Villa, Celestina da Costa Alves, hateten ba Agência Tatoli, iha ospitál internamentu, kuarta ne’e.
Notísia relevante: Estudante 8.223 iha Viqueque simu ona vasina Pfizer
Sentru saúde halo koordenasaun no promosaun, nune’e estudante inklui populasaun tomak ne’ebé kompleta ona vasina doze daruak bele simu vasina booster.
Maski nune’e, ekipa iha terrenu sempre hasoru problema bainhira laiha informasaun.
“Dezafiu ne’ebé ami hasoru maka bainhira to’o tiha eskola, dalaruma estudante sira laiha, dalaruma ami halo tiha oráriu vasina, maibé bainhira to’o eskola la kondis ho situasaun iha eskola. Ita labele realiza vasina ida-ne’e, maibé ami kontinua halo koodenasaun ho líder komunitáriu sira atu mobiliza komunidade no estudante sira atu simu vasina,” nia akresenta.
Nia dehan, vasina Pfizer ne’ebé daudaun sei iha Sentru Saúde postu Viqueque Villa hamutuk 132 viál, ne’ebé sufisente hodi fó vasina ba estudante sira.
Jornalista : Vitorino Lopes da Costa
Editora : Julia Chatarina
