COVALIMA, 27 abril 2022 (TATOLI)—Diretór Servisu Munisípal Asaun Sosiál (SMAS), Abrão Nascimento, informa iha trimestre dahuluk (janeiru-marsu) ne’e SMAS Covalima ezekuta verba Orsamentu Jerál Estadu (OJE) tinan 2022 atinje ona 45%.
“Iha trimestre dahuluk ne’e, SMAS Covalima ezekuta Orsamentu Jerál Estadu tinan 2022 atinje ona 45%,” Abrão Nascimento informa ba Agência Tatoli, iha nia knar fatin Suai Loro, kuarta ne’e.
OJE tinan 2022 prevee ba SMAS ba kategoria bens no servisu hamutuk $54,700.00 hosi orsamentu ne’e, ezekuta hodi sosa kaixaun ba matebian família vulneravel hamutuk 101 ho orsamentu $14,295, ba viajen lokál $2,80.00, realiza atividade sermináriu kona-ba violénsia domestika iha postu administrativu Zumalai $302.85.
Aleinde ne’e, SMAS mós ezekuta orsamentu ba konvustível $222,96, orsamentu despeza operasionál $300.00 no saláriu ba funsionáriu SMAS hamutuk $13,440, nune’e totál orsamentu ne’ebé mak uza ona hamutuk $28,317.96 no osan saldo ba kaixaun nian hamutuk $52,510.
Tuir nia, servisu asaun sosiál realiza semináriu foku ba violénsia domestika bazea ba dadus hosi organizasaun noun governamentál iha Covalima hatudu katak kazu viol’ensia domestika sei aas tebes iha Covalima.
“Ami tenke prevee orsamentu halo sensibilizasaun hodi hamenus númeru kazu violénsia domestika iha munisípiu Covalima,” nia dehan.
Antes ne’e, nia dehan, iha loron 14 fulan-marsu 2022 konselór FOKUPERS Covalima fó sai katak hahú fulan janeiru-marsu, FOKUPERS rejista kazu hosi munisípiu Ainaro, Manufahi no Covalima hamutuk 18, ho tipu kazu sira hanesan Violénsia doméstika, violénsia seksuál, abuzu seksuál ba labarik minór, hadau malu oan no hadau malu rai.
Jornalista : Celestina Teles
Editór : Cancio Ximenes
