iklan

BOBONARO, HEADLINE, IMAJEN, INKLUZAUN SOSIÁL, MUNISÍPIU, POLÍTIKA

SEA sensibiliza polítika alterasaun klimátika iha Maliana

SEA sensibiliza polítika alterasaun klimátika iha Maliana

Sekretariu Estadu Ambiente (SEA) sosializa politika alterasaun klimatika,iha postu administrativu Maliana,munisipiu Bobonaro,imagen Tatoli/Sergio da Cruz.

BOBONARO, 27 abríl 2022 (TATOLI) – Sekretaria Estadu Ambiente (SEA) liuhosi Diresaun Nasionál ba Alterasaun Klimátika (DNAK), kinta ne’e sensibiliza polítika alterasaun klimátika ba autoridade no komunidade iha postu administrativu Maliana, munisípiu Bobonaro.

Sensibilizasaun ne’e bazea ba dadus alterasaun klimátika nasionál ne’ebé halo estudu hosi Jon Barnett et al iha 2005 katak, temperatura iha Timor-Leste komesa sa’e ona, no sei kontinua sa’e hosi 0.3-1.2ºC iha  2030, no temperatura aumenta liután hosi 0.8-3.6ºC iha 2070.

Reprezentante Diretór Nasionál ba Alterasaun Klimátika, Luis dos Santos Belo. Imajen Tatoli/Sérgio da Cruz.

Enkuantu tuir dadus iha 2011 katak tasi-been iha Timor-Leste sa’e ona 5.5 mm kada tinan no Organizasaun Peskiza Sientífika oIndustriál Commonwealth (CSIRO, sigla inglés) katak, Timor-Leste hetan udan menus iha tempu udan, bee-matan balun menus no maran. Nune’e mós udan maka’as dalaruma iha tempu bailoron, tasi-been sei sa’e, fatin barak iha Timor-Leste inklui fatin balun iha Lautem, Baucau, Manatuto vulnerável ba mudansa klima.

Parte tasi ibun iha kapitál Dili sei iha tasi-okos iha tempu tinan atus-lima mai tanba kada tinan atus-ida tasi-been sa’e besik metru ida.

“Ami-nia atividade ohin mai halo sensibilizasaun ba autoridade munisipál, postu no estudante sira, atubele apár ho polítika alterasaun klimátika ida-ne’e hodi bele enkaixa iha planu setoriál hotu-hotu atubele adapta no mitiga impaktu alterasaun klimátika iha ita-nia rai,” Reprezentante Diretór Nasionál ba Alterasaun Klimátika, Luis dos Santos Belo, informa ba Tatoli, iha salaun PDHJ Bobonaro, kinta ne’e.

Estudante sira partisipa sensibilizasaun polítika alterasaun klimátika iha Maliana. Imajen Tatoli/Sérgio da Cruz.

Nia subliña, iha nesesidade atu sosiedade no liu autoridade munisipál, integra iha planu asaun anuál no planu munisipiu nian tanba alterasaun klimátika ne’e fó impaktu ba setór saúde no agrikultura, bainhira udan la mai bele afeta ba animál sira-ne’ebé hakiak no agrikultór sira labele halo produsaun.

“Ami-nia espetativa katak ho sensibilizasaun sira-ne’e autoridade munispál bele apár hodi nune’e ita bele influénsia komunidade sira atu nune’e bele redús impaktu alterasaun klimátika liuhosi aktividade kada loron,” nia heteten.

Xefe Departamentu Ambiente Munisípiu Bobonaro, Mário Barreto, reforsa atividade ne’e importante tebes ba sosiedade hotu tanba impaktu alterasaun klimátika oras ne’e mundu tomak preokupa inklui Timor-leste.

“Fahe informasaun ba ita-nia autoridade munisípiu, xefe setoriál sira atubele hatene planu ba future, saida maka ita bele halo, sé ita la hetan informasaun kle’an, difisil tebes ba ita atu proteje ambiente ba future,” nia akresenta.

Partisipa iha atividade ne’e mai hosi autoridade munisípiu, diretór liña setoriál, reprezentante PNTL eskuadra Maliana, bombeiru, seguransa sivíl, estudante hosi Sentru Aprendizajen Formasaun Eskolár (CAFE) Maliana no Eskola Tékniku Vokasionál (TEKVOK) númeru II Malibaka, Yamato Maliana no komunidade sira iha postu administrativu Maliana.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!