DILI, 28 abril 2022 (TATOLI)—Ministériu Transporte no Komunikasaun (MTK) prepara ona lista transporte rodoviáriu públiku hamutuk 3.871, aéreu rua no marrítima rua atu hetan subsídiu kombustível.
Kestaun ne’e relasiona ho dekretu-lei númeru 18/2022 kona-ba atribuisaun subsídiu kombustível ba operadór transporte rodoviáriu públiku, transporte aéreu no marrítima nasionál, inklui adkirente kombustível destinadu ba atividade agríkola no piskatória, ne’ebé tempu badak Governu sei implementa.
Diretór Jerál MTK, Gaspar de Araújo, hateten ohin ekipa legál no tékniku hosi liña ministeriál hanesan MTK, Ministériu Agrikultór no Peska (MAP) no Ministériu Petróleu no Minerál (MPM) halo enkontru hodi ko’alia pontu importante tolu.
“Ami diskute, dahuluk, kada ministériu tenke prepara ida-idak ninia diploma, daruak, ami fó knaar ba MPM mak prodús voucher hodi haruka ba MAP no MTK distribui ba operadór transporte sira ne’ebé rejistadu ona no sei uza voucher ne’e ba estasaun kombustível iha territóriu tomak no ikus liu prodús diploma konjuta ne’ebé ohin finaliza ona aban (29/04) sei públika iha Jornál Repúblika no entra em vigor iha loron 01 maiu to’o 31 jullu, ho durasaun fulan-tolu,” Diretór Jerál informa ba Agência Tatoli, via telefónika, kinta ne’e.
Notísia relevante: Governu koordena mekanizmu implementasaun subsídiu kombustível ho entidade envolvidu
Biban ne’e, Diretór husu ba transporte públiku sira atu kontinua hala’o movimentu tanba la kleur tan sei hetan subsídiu kombustível.
“Labele hasa’e tarifa tuir ita-boot sira-nia hakarak tanba iha tempu badak ita-boot sira sei hetan ita-boot sira-nia direitu,” nia apela.
Lansa medida apoia kombustível
Governu liuhosi reuniaun Konsellu Ministru iha loron 13 abril 2022 aprova dekretu-lei númeru 18/2022 loron 19 abril no promulga ona hosi Prezidente Repúblika iha loron 19 abril 2022, ne’ebé estabelese subsídiu kombustível.
Notísia relevante: PR Lú Olo promulga dekretu-lei subsídiu kombustível
Nune’e, atu garante estabilidade presu kombustível iha merkadu nasionál hodi evita impaktu negativu ekonomia ba konsumidór, maka lejizlativa ne’e fó biban ba Governu halo intervensaun merkadu kombustível liuhosi atribuisaun subsídiu ba operadór transporte sira.
“Medida ne’e sei benefisia setór ne’ebé hetan liu impaktu folin kombustível sa’e, hanesan operadór transporte rodoviáriu públiku, operadór aéreu no marrítima nasionál, inklui ba kompradór kombustível ne’ebé destina ba atividade agríkola no peska,” Ministru esplika liuhosi konferénsia imprensa iha slaun MTK, Caicoli.
Subsídiu ne’e sei realiza liuhosi vale deskontu (voucher) ida atu uza iha estasaun sira ne’ebé maka fa’an kombustível ho ninia montante ne’ebé korrespondente ba 100% hosi valór diferensa entre folin médiu gazolina ka gazóleu litru ida, iha dezembru 2021, folin gazolina ka gazóleu litru ida iha data fó sai voucher kombustível nian, ho konsiderasaun ba tipu kombustível nian no ninia karakterístika sira.
“Ne’e signifika katak medida ida-ne’e sei permite benefisiáriu sira sei selu de’it valór médiu kombustível hosi fulan-dezembru tinan kotuk,” nia tenik.
MTK ne’ebé responsável ba pagamentu subsídiu ba operadór transporte rodoviáriu públiku, operadór aéreu no marrítima nasionál sira, enkuantu MAP responsável ba subsídiu ba kompradór kombustível ne’ebé maka destina ba atividade agríkola no peska.
“Ita besik konklui prosedimentu sira ne’ebé nesesáriu hodi la kleur tan bele hahú pagamentu subsídiu ne’e,” nia salienta.
Folin kombustível daudaun ne’e sa’e tanba kauza hosi situasaun polítika mundiál no funu entre Ukránia no Rúsia ne’ebé afeta ba nasaun hotu inklui Timor Leste.
Jornalista : Arminda Fonseca
Editora : Julia Chatarina
