Ekipa konjunta sei halo operasaun no rekolla karreta Estadu 500
DILI, 29 abril 2022 (TATOLI)—Pontu Vogál Operasaun Komisaun Antí-Korrupsaun (CAC, sigla portugés), Euclides Madeira, informa, iha tempu badak, molok tama loron 20 maiu, ekipa konjunta sei halo operasaun no rekolla karreta Estadu ne’ebé identifika ona.
Ekipa konjunta kompostu hosi Komisaun Funsaun Públika (KFP), CAC, Patrimóniu Estadu, Diresaun Nasionál Transporte Terrestre (DNTT), no Polísia Nasionál Timor-Leste (PNTL) Unidade Polísia Tránzitu.
“Karreta Estadu ne’ebé daudaun ne’e ita-nia ekipa identifika no fiksa ona atu rekolla hamutuk 500 resin,” Pontu Vogál CAC hateten iha salaun Patrimóniu Estadu, Balide, sesta ne’e.
Inisiativa ne’e bazeia ba Rezolusaun Governu, tanba nota katak karreta Estadu hamutuk 500 resin, balun funsionáriu mak uza no balun la’ós funsionáriu mak uza, tanba ne’e ekipa konjuta sei rekolla ba Patrimóniu Estadu.
Notísia relevante: Governu kria subsídiu mensál transporte ba funsionáriu administrasaun públika
Antes ne’e, ekipa konjunta halo beibeik operasaun konjuta ba karreta Estadu maibé Rezolusaun Governu 130/2021 no Dekretu-lei númeru 21/2021, ne’ebé foin vigor iha janeiru 2022, kona-ba subsídiu transporte ne’ebé aloka ba kargu diretivu no xefia sira iha instituisaun Estadu, hotu-hotu la autoriza uza karreta Estadu fora oras serbisu.
“Rezolusaun ne’e implementa iha janeiru 2022, entaun ita la’o tuir no fó kompeténsia ba ekipa konjunta atu haree tanba kestaun ne’e mak ita muda nia mekanizmu atu halo atuasaun. Dahuluk ekipa konjunta Patrimóniu Estadu sira ba rekolla tiha karreta sira ne’ebé identifika ona mak define realoka hira ba minisitériu sira no balun ba leilaun,” nia esplika.
Jornalisia : Arminda Fonseca
Editora : Julia Chatarina
