iklan

EDUKASAUN, HEADLINE

FDCH fó bolsa estudu parsiál ba estudante 1.000

FDCH fó bolsa estudu parsiál ba estudante 1.000

Diretór Ezekutivu FDCH, Cristóvão dos Reis, entrega dokumentu nota kooperasaun bolsa estudu parsiál ba Reitór UNDIL, José Belo Pereira, iha salaun Knowledge Center FDCH, sesta (29/04). Imajen Tatoli/Francisco Sony

DILI, 29 abril 2022 (TATOLI)—Ministériu Ensinu Superior Siénsia no Kultura (MESSK) liuhosi Fundu Dezenvolvimentu Kapitál Umanu (FDCH, sigla portugés) realiza seremónia asina nota entendimentu ho Instituisaun Ensinu Superiór Privadu 13, hodi fó bolsa estudu parsiál ba tinan akadémiku 2022.

“Impotánsia hosi nota entendimentu ne’e mak fó bolsa estudu parsiál ba ita-nia estudante hamutuk 1.000, ne’ebé sei distribui ba instituisaun privada sira iha Timór-laran tomak,” Diretór Ezekutivu FDCH, Cristóvão dos Reis, hateten, iha salaun Knowledge Center, FDCH, sesta ne’e.

Notísia relevante: FDCH fó ona bolsa estudu ba timor-oan 6.401 durante tinan-sia

Orsamentu ne’ebé tinan ne’e aloka ba bolsa estudu ho montante millaun $4, hodi implementa programa bolsa parsiál, bolsa hakbiit, púr méritu dosente inklui individuál.

Nota ne’e asina direta hosi Diretór Ezekutivu FDCH, Cristóvão dos Reis, Reitór universidade, inklui Prezidente institutu sira, ne’ebé akompaña hosi Ministru Ensinu Superior Siénsia no Kultura, Longuinhos dos Santos ne’ebé nu’udar Prezidente Konsellu Administrasaun ba FDCH.

Nune’e, iha tempu besik FDCH sei koloka bolseiru ba universidade no instituisaun  privadu sira hodi hahú hala’o sira-nia estudu ho nível Diploma III to’o Lisensiatura, tuir área estudu ne’ebé bolseiru sira hili ona iha tempu inskrisaun iha munisípiu hotu no inklui Rejiaun Administrativa Espesiál Oé-cusse Ambeno  (RAEOA), ho kolaborasaun hosi Ministériu Edukasaun Juventudu no Desportu (MEJD).

Benefisiáriu bolsa parsiál ba tinan akademiku 2022 ne’e sei hala’o estudu iha área importante sira hanesan edukasaun, saúde, agrikultura, enjeñaria no teknolójia, turizmu, direitu no siénsia sosiál.

“Durante bolseiru sira hala’o sira-nia estudu, Governu liuhosi FDCH sei apoiu finanseiru hodi selu kustu propina kada semestre to’o sira termina estudu, maibé inan-aman mak sei selu kustu moris bolseiru sira,” Diretór akresenta.

Programa bolsa parsiál implementa bazeia ba Diploma Ministérial númeru 78/2021, 10 novembru, kona-ba rejime atribuisaun bolsa estudu iha territóriu nasionál no regulamentasaun pedidu individuál, apoiu finaseiru estudu ensinu superiór akreditadu nasionál, iha artigu 4 kona-ba atribuisaun bolsa parsiál.

Universidade no instituisaun 13 ne’ebé asina nota entendimentu ho FDCH mak hanesan Universidade da Paz (UNPAZ), Universidade Dili (UNDIL), Universidade Orientál (UNITAL), Dili Institute of Technology (DIT), Insitute of Business (IOB), Institutu Superiór Cristal (ISC), Insititu Siénsia Saúde (ICS).

East Timor Coffee Institute (ETCI), Instituto Profissional de Canossa (IPDC), Institutu São João de Brito (ISJB), Institutu Boaventura Timor-Leste (IBTL), João Saldanha University (JSI) no Universidade Católica de Timor (UCT).

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!