DILI, 29 abril 2022 (TATOLI)—Ministériu Ensinu Superior Siénsia no Kultura (MESSK) liuhosi Fundu Dezenvolvimentu Kapitál Umanu (FDCH, sigla portugés), tinan ne’e sei loke oportunidade bolsa estudu hamutuk 30 ba Portugal.
“Tinan ne’e, ita-nia planu atu haruka bolseiru ba rai-li’ur hamutuk 30, hanesan rektrutamentu pur méritu no lisensiatura na’in-25 no mestradu na’in-lima,” Diretór Ezekutivu FDCH, Cristóvão dos Reis, hateten, iha salaun Knowledge Center FDCH, sesta ne’e.
Notísia relevante: Dosente na’in-140 tuir teste ba bolsa estudu iha Portugal
Aleinde ne’e, FDCH loke oportunidade bolsa estudu hamutuk 48 ba profesór sira ne’ebé hanorin iha instituisaun no univesidade privada iha Timór laran tomak.
“Hosi númeru 48 ne’e, balun anunsiu ona no balun seidauk. Balun ne’ebé fó sai rezultadu mak profesór sira ne’ebé iha universidade privada, ba bolsa pur méritu, ne’ebé semana ne’e ka semana oin anunsia ona. Ba sira ne’ebé iha ona rezultadu, sei aransa ba Portugal iha setembru 2022,” nia akresenta.
Notísia relevante: FDCH fó ona bolsa estudu ba timor-oan 6.401 durante tinan-sia
Totál bolsa estudu ne’ebé Governu fó ba estudante sira liuhosi FDCH hamutuk 8.000, ne’ebé hosi númeru ne’e, sira ne’ebé hetan oportunidade ba rai-li’ur hamutuk 5.000, bolseiru ne’ebé konklui ona estudu no repatria ona hamutuk 3.000 no daudaun halo ona atividade profisionál.
Jornalista : Arminda Fonseca
Editora : Julia Chatarina
