MALAZIA, 28 abríl 2022 (TATOLI) – Embaxadora Timor-Leste iha Malazia, Joana Veneranda Amaral, hamutuk ho nia ekipa vizita jogadór selesaun nasionál U-23 hodi fó apoiu morál atu iha espiritu desportivu, nune´e bele dezenvolve sira nia talentu hodi lori Timor-Leste ba oin.
“Ha’u kontente tebes mai vizita ita nia jogadór sira ne’ebé atu ba joga iha Vietname, orgullu hanesan timoroan sempre fó apoiu morál no suporta makas ba jogadór sira atu hatudu rezultadu di’ak iha jogu sira ne’ebé atu halo ne’e”, dehan embaxadóra ne’e ba Agência TATOLI iha Hotel Dorsett Malazia, kinta ne’e.
Nia reforsa, prezensa ne’e atu fó suporta morál ba jogadór sira atu sira bele iha espiritu deportivu atu dezenvolve sira nia talentu oinsa atu lori Timor-Leste nia naran iha jogu internasionál sira.
“Nasaun barak mak sei tuir jogu ida ne’e, maibé jogadór timoroan sira tenke iha espiritu fiar-an atu hatudu katak Timor-Leste mós bele, buat manán ka lakon ne´e normál maibé atetude hodi simu rezultadu lakon ho manán ne’e mak di’ak”, nia dehan.
Iha fatin hanesan, kapitaun ekipa, Filomeno Junior da Costa, agradese ba embaxadora iha Malazia bele mai vizita hodi fó ona kontente ba sira atu hala´o jogu sira ho di’ak.
“Vizita embaxada nian mai iha ne’e ami kontente tanba bele fó apoiu moral mai ami, ami sei hatudu jogu ne’ebé di’ak kontra Malazia iha aban joga amigável no iha Sea Games mai ne’e” refere Filomeno.
Jogador selesaun ne’ebe iha Malazia hamutuk na’in 23 akompaña hosi ofisiál na’in-hitu no jornalista Tatoli na’in ida.
Tuir orariu sei aranka ba Vietnam hodi partisipa Sea Games 04 maiu tinan ida ne’e.
TL preparadu hala´o jogu amigavel kontra Malazia
Treinadór prinsipál selesaun nasional U-23 Fabio Maciel da Silva, hateten durante semana ida iha Malazia treinamentu ba jogadór sira la´o ho di’ak iha treinamentu ba tátiku no seluk tan ne’ebé jogadór sira presiza halo hodi hatudu iha joga amigável kontra Malazia.
“Treinamentu durante iha ne’e barak liu iha tátiku ba jogadór sira, bainhira sira halo sala tenke hadia tutuir iha parte sira bola kantu, bola falta, oinsa halo bareira, faze defensivu, ofensiva hodi hasoru adversáriu sira ho di’ak, tanba aban ne’e jogu boot ida hasoru Malazia ita preparadu tebes”, dehan Fabio ba Agência TATOLI iha kampo PKNS Malazia, kinta ne’e.
Nia dehan, hasoru Malazia U-23 hanesan jogu ne’ebé di’ak tanba ekipa adversáriu iha forsa ne’ebé makas ho nune’e uza oportunidade ne’e hodi halo observasaun nune’e bele prepara másimu ba Sea Games.
“Jogu amigável ne’e barak liu ha’u hodi halo observasaun tanba rezultadu ne’e importante, fiar an katak ita manan, maibé buat hotu fila ba komportamentu ekipa nian”, revela.
Ho jogu kontra Malazia ne’e konkluzaun ikus ba preparasaun ekipa Timor-Leste nian atu kompete iha Sea Games ne’ebé sei akontese iha Hanoi Vietname maiu mai ne’e.
Jogu entre ekipa rua ne’e sei hala´o iha Estádiu Nasional Malazia iha tuku 21:15 kalan oras Malazia nian.
Tuir orariu ne’ebé iha mudansa uitoan tanba selesaun nasional U-23 Timor – Leste sei aranka ba Vietname iha 04 maiu ho jogadór hamutuk na’in 23 treinadór no ofisial na’in hitu no jornalista na’in ida.
Oráriu jogu nian Timor – Leste sei kontra Filipina, Indonezia, Vietname no Myanmar.
Jornalista ; Hortencio Sanches
Editór : Zezito Silva
