DILI, 29 abril 2022 (TATOLI)—Ministru Edukasaun Juventude no Desportu (MEJD), Armindo Maia, daudaun ne’e tau importánsia liu rezolve hadi’a infraestrutura eskolár iha territóriu tomak do que harii edifísiu ministériu.
“Ha’u la presiza serbisu iha andár lima to’o 10 nia laran, ha’u presiza serbisu de’it iha edifísiu dignu. Tanba ne’e, orsamentu sira ne’ebé ministériu prevee fó liu prioridade hadi’a uluk eskola sira atubele dezenvolve liután kualidade edukasaun iha Timor-Leste. Tinan ne’e ita hahú hadi’a ona eskola iha territóriu nasionál hamutuk 240,” Ministru informa foin lalais ne’e ba Agência Tatoli, iha Palásiu Governu.
Notísia relevante: Eskola 197 asina ona kontratu projetu komunitáriu hadi’a eskola
Ministru konsidera, estudante atu hetan edukasaun di’ak presiza iha kondisaun eskola di’ak no dignu.
“Edifísiu ministériu iha Vila Verde ne’ebá halo desde tempu okupasaun Indonézia, nune’e bainhira rai nakdoko maka’as ema hotu iha laran tenke halai sai tanba edifísiu ne’e ninia riin sira kuaze ferujen hotu ona. Nune’e mós edifísiu andár tolu iha kotuk ne’ebé halo iha tempu hirak liubá agora halis ona ba sorin,” Ministru akresenta.
Tuir governante ne’e, presiza duni iha edifísiu di’ak ba ministériu hodi funsionáriu sira bele halo serbisu ho di’ak, maibé presiza mós iha planu orsamentu.
“Ita seidauk iha planu harii edifísiu foun ba ministériu hanesan ministériu balun halo ona tanba nia-nia planu sei kontinua hadi’a edifísiu eskola foun ba estudante sira bele estuda iha fatin dignu,” Ministru Armindo tenik.
Antes ne’e, Diretór Servisu Edukasaun munisípiu Dili, Carlito da Silva, husu ona ba Ministru Edukasaun Juventude no Desportu atu tau importánsia harii edifísiu foun ba MEJD tanba edifísiu atuál ho kondisaun ladún di’ak.
“Ha’u husu de’it ba Ministru atu koloka fundu ruma hadi’a edifísiu di’ak hanesan Ministériu Finansa no Ministériu Solidariedade Sosiál no Inkluzaun. Ministériu Edukasaun Juventude no Desportu tenke halo ninia edifísiu ida di’ak atubele garante serbisu funsionáriu sira,” Diretór ne’e sujere.
Jornalista : Tomé Amado
Editora : Julia Chatarina
