COVALIMA, 29 abríl 2022 (TATOLI)—Ministra Saúde, Odete Maria Freitas Belo, enkoraja estudante sira iha Covalima atu simu vasina Pfizer doze dahuluk atu prevene an hosi moras COVID-19.
“Ha’u enkoraja estudante sira atu simu vasina. Ha’u husu ba alin sira labele tauk atu simu vasina ne’ebè mak iha tanba vasina sira organizasaun saúde mundial kontrola ona. Labele fiar informasaun vasina liu prazu ona maibé ita asegura nia kualidade ne’ebè di’ak. Ami-nia prezensa iha ne’e atu fó vasina Pfizer ba ita-boot sira hodi prevene moras COVID-19,” Ministra Saúde, Odete Maria Freitas Belo, hateten ba estudante sira iha Ensinu Báziku Sentrál (EBC, siglaportugés) Suai Loro, sesta ne’e.
Governu lori vasina mai la’ós atu fó moras ba estudante sira maibé ho objetivu ida atu iestudante sira-nia moras bele di’ak no imunidade forte hodi hasoru COVID-19 no estudante sira ramata eskola sekundária tenke iha kartaun vasina ne’e sai hanesan rekezitu ida.
Tanba ne’e, Governu tenke fasilita sidadaun simu vasina foin hetan kartaun, nune’e moras labele da’et ba estudante sira no sira tenke kontribui tanba la’ós iha Timor-Leste de’it maibé ida-ne’e problema mundiál.
Diretór Ensinu Báziku Sentrál Suai Loro, Francisco Gonçalves Babo hateten, estudante iha EBC Suai Loro ohin na’in-100-resin mak sei simu vasina Pfizer dose dahuluk.
“Tuir dadus ne’ebè ami fó estudante 236 atu simu vasina maibe ohin estudante na’in-100-resin mak simu vasina Pfizer ba doze dahuluk. Estudante sira seluk a mai tanba sira ezame hotu ona entaun estudante sira la tama eskola,” nia dehan.
Estudante sira-ne’ebé simu vasina ne’e hosi estudante kintu ano to’o nuno ano na’in-100-resin mak kotribui hodi simu vasina.
Aleinde ne’e. nia informa, profesór na’in-34 mós simu vasina ba doze datoluk ni’an.
Enkuantu, durante Ministra Saúde nia prezensa iha Covalima hodi hala’o vizita ba eskola sira hanesan EBC Suai Loro, Eskola Tékniku Vokasionál Akar Laran no prizaun Covalima hodi vasina ba estudante no prizioneiru sira.
Antes ne’e, Governu fó vasina ba sidadaun idade adultu sira maibé ho prosesu ne’ebè iha bele fó mós vasina ba labarik idade 12-17, tanba ho razaun virus Corona ne’e mós da’et ba labarik sira.
Nia informa, iha tipu vasina oioin maibé Timor-Leste uza tipu vasina AstraZeneca, Sinovac no Pfizer ne’e la’ós Governu mak sosa maibé apoiu hosi naaun Xina, Austrália no nasaun seluk tán.
Jornalista : Celestina Teles
Editór : Cancio Ximenes
