DILI, 29 abríl 2022 (TATOLI)-Tribunál Distritál Dili (TDD), sesta ne’e, halo re-julgamentu ba kazu arguida Emilia Pires ho Madalena Hanjam tanba komete kazu partisipasaun ekonomia no negósiu ne’ebé maka previstu iha artigu 299 kodigu penál Timor-Leste.
Arguida na’in rua ne’e, komete krime partisipasaun ekonómia no negósiu ne’ebé previstu iha artigu 299 kodigu penál Timor-Leste bainhira Emilia Pires nu’udar Ministra Finansas no Madalena Hanjam nu’udar Vise Ministra Saude hodi halo akizasaun sosa kama ba pasiente Ospitál Nasionál Guidu Valadares (HNGV) ho montante Millaun $ 1, iha Governu anteriór nia tempu.
Notísia Relevante:Deskonfia, Emilia Pires “Kontribui” ba Kazu Sosa Karreta Prado PN
Iha tinan 2016, Tribunál Distritál Dili hala’o ona julgamentu hodi rona parte arguida na’in rua no sasin na’in sira.
“Ohin Tribunál Distritál Dili (TDD) halo fali julgamentu ka rejulga kazu eis Ministra Finansas Emilia Pires no Madalena Hanjam, tanba primeiru defeza husu para arola fali sasin sira no segundu maka arguida Emilia Pires la marka prezensa iha julgamentu,”Advogadu Privadu arguida Madalena Hanjam, José Guterres ba jornalista iha TDD, sesta ne’e.
“Tanba ne’e parte defeza mós husu ba Tribunál atu equizitos ka haree filafali ba prova sira antes ne’e iha Tribunál primeira instansia deside tiha ona hodi husu Tribunál Rekursu anula tiha desizaun antes ne’e, hodi bele halo julgamentu para halo akordaun foun ba kazu ne’e rasik,” nia hatutan.
Liuhosi audensia julgamentu ne’e, Ministériu Públiku husu ba Tribunál atu tetu kestaun hirak ne’e, molok foti desizaun atu halo fali akordaun foun ba kazu ne’e rasik.
Tanba, tuir Ministériu Públiku ne’ebé titulár ba kazu Emilia Pires no Madalena Hanjam nian ne’e, informa la’ós prova foun, maibé kazu ida julgamentu hotu ona, no rona hotu ona arguida no testamuña sira.
Ho nune’e, Ministériu Públiku deklara se mantein nafatin sira-nia promosaun krime ba arguida na’in rua ne’e.
Hafoin TDD rona tiha deklarasaun husi Ministériu Públiku no parte Defeza nian, Tribunál aseita no deside hodi adia julgamentu ba kazu ne’e iha loron 1 Jullu 2022, hodi halo fali julgamentu foun ba kazu Emilia no Madalena Hanjam.
Audensia julgamentu ne’e, prezide hosi Juíz koletivu, José Maria Araújo, Francisca Cabral, Maria Solana, enkuantu Ministériu Públiku reprezenta husi Prokuradór, Angelina Saldanha, Rógerio Viegas, no arguida Madalena Hanjam no hetan asistensia legál husi José Guterres inklui advogadu nain-rua seluk.
Notísia Relevante:Governu Suspende Pensaun Vitalisia ba Emilia Pires
Jornalista: Natalino Costa
Editór : Agapito dos Santos
