DILI, EDUKASAUN, NASIONÁL

Profesór 170 partisipa formasaun siénsia naturál no matemátika

Profesór 170 partisipa formasaun siénsia naturál no matemátika

Imajen google

DILI, 03 maiu 2022 (TATOLI) – Profesór ensinu báziku primeiru no segundu siklu iha Munisípiu Dili hamutuk 170 pesoa partisipa formasaun siénsia naturál no matemátika hodi hasa’e koñesimentu no abilidade   aplikasaun pratika iha aula laran.

Formadór INFORDEPE, Agostinho da Conceição Sarmento Pinto dehan, konteúdu hosi formasaun ne’e foka ba area Siénsia naturál no Matemátika.

“Ami foka liu ba aplikasaun matéria pratika iha  aula laran liu hosi esperimentu sira. Dala ruma ita hanorin de’it teoria maibé profesór sira labele implementa pratika ho di’ak tanba sira  la dun koñese matéria ne’ebé bele utiliza iha pratika,” Formadór INFORDEPE ne’e hateten ba jornalista sira iha eskola EBC 30 Agostu Komoro, tersa ne’e.

Nia dehan, formasaun ne’e sei lao durante  semana ida no sei konklui iha sábadu. Formasaun ne’e rasik  partisipa hosi profesór hamutuk 170 iha Dili hosi nivel ensinu báziku primeiru no segundu siklu.

Formadór INFORDEPE ne’e hateten kuaze profesór lubuk ida maka   aproveita   formasaun kona ba aplikasaun matéria pratika iha aula laran.

“Ha’u haree no identifika iha profesór lubuk ida maka iha interese hakarak aproveita duni formasaun ne’e. Tanba durante ne’e sira la hetan matéria pratika, entaun ho oportunidade ne’e sira hakarak aproveita hodi fahe fila fali ba estudante sira,” tenik nia.

Formasaun ba profesór primeiru no segundu siklu iha area siénsia naturál no matemátika ne’e hetan kooperasaun entre UNESCO ho INFORDEPE. Formasaun ne’e konsege kobre ona munisípiu hotu inklui RAEOA no agora taka ho Dili.

Tuir dadus ne’ebé hato’o hosi formadór ne’e katak totál profesór ne’ebé hetan ona formasaun iha area siénsia naturál no Matemátika a-nivel nasionál ne’e hamutuk 1.800. Formasaun ne’e hahú hosi janeiru-abríl 2022.

Iha fatin hanesan Diretora INFORDEPE Asuntu Formasaun ba Mestre, Marcelina husu ba profesór  170 ne’ebé tuir formasaun iha loron lima nia laran iha  eskola EBC 30 Agostu Komoro atu bele  aproveita   ho didi’ak  matéria ne’ebé hato’o hosi formadór sira hodi bele fó vantajen  no  koñesimentu liu tan ba profesór sira.

Nia hateten, kualidade edukasaun mai hosi profesór sira hodi fahe ba estudante sira. Ne’ebé formasaun ida ne’e sei la para iha ne’e de’it, tinan ida ne’e Ministériu Edukasaun liu hosi INFORDEPE realiza ona formasaun ba profesór iha territóriu nasionál hamutuk 1.800 no tinan oin mós sei realiza tan ba profesór 1.800.

“Ha’u husu ba profesór sira akompaña ho didi’ak ba matéria formasaun sira ne’e. Ha’u fiar katak imi mesak ema matenek de’it maibé formasaun sira hanesan ne’e tenke kontinua beibeik tanba iha buat foun balun maka ezije profesór sira atu aprende hodi aplika ba alunu sira,” hateten nia.

Jornalista: Tomé Amado

Editóra   : Armandina Moniz

 

 

iklan
iklan

Leave a Reply

iklan
error: Content is protected !!