iklan

BOBONARO, HEADLINE, MUNISÍPIU, SEGURANSA, SOSIEDADE SIVĺL

‘Asaun dame’ rezulta konflitu iha Bobonaro hahú menus

‘Asaun dame’ rezulta konflitu iha Bobonaro hahú menus

Prezidente Sub-KRAM Munisípiu Bobonaro, José Ramos. Imajen Tatoli/Sérgio da Cruz.

BOBONARO, 03 maiu 2022 (TATOLI) – Bazea ba monitorizasaun hosi Komisaun Reguladora Arte Marsiál (KRAM) hala’o atividade diálogu ka asaun dame ne’ebé realiza iha tinan kotuk hamutuk ho Diresaun Nasionál Prevensaun Konflitu Komunitária (DNPKK) rezulta konflitu iha munisípiu Bobonaro hahú menus.

Prezidente Sub-KRAM Munisípiu Bobonaro, José Ramos, hateten konflitu hahú menus tanba asaun dame ne’e halo ho espíritu kulturál, parte lia-na’in sira koalia iha ai-lulik no fatuk-lulik sira hodi kesi metin atu hata’uk ema halo problema.

“Ha’u fó ezemplu, iha Bobonaro ita halo iha agostu 2020 kuaze problema laiha, depois iha Balibo tinan kotuk iha Natál problema maka’as mais foin lalais ami realiza asaun dame, atividade polítika kampañaa tún sa’e mós laiha problema, signifika katak ita nia-ema sira moris hanesan sidadaun komprende ona, ida-ne’e hatudu progresu di’ak, tanba komflitu hahú menus oituan,” nia informa ba Tatoli, iha Maliana, kuarta ne’e.

Maski nune’e KRAM planeia kontinua halo monitorizasaun ba GAM sira-ne’ebé daudaun ne’e halo hela sira-nia atvidade formasaun subar iha tempu kalan, ne’ebé kontra lei arte marsiál katak formasaun tenke hahú hosi tuku 07:00 dadeer to’o tuku 18:00.

Ramos haktuir, iha semana kotuk arte marsiál hosi PSHT husu sub-KRAM munisípiu atu halo atividade formasaun, maibé la konsege hetan autorizasaun tanba daudaun seidauk iha lei ne’ebé mak autoriza GAM atu halo formasaun, tanba estadu bele dehan reativa maibé seidauk bele halo atividade.

“Sira halo aktvidade iha-ne’ebé de’it ami informa Polísia, sei ba kaptura hodi ba prosesu, tanba dekretu-lei númeru 5/2017 sei vale hela, agora lei foun ne’ebé KRAM prepara seidauk ba diskute iha Parlamentu Nasionál, ne’e signifika lei ne’e sei vale, entaun sira seidauk bele halo atvidade,” nia argumenta.

Tanba ne’e nia husu ba kordenador GAM hotu iha munisípiu Bobonaro atu kopera ho governu labele halo atvidade subar,hodi hein lei foun ne’ebé governu prepara hetan ona aprovasaun mak foin bele halo atividade formasaun tuir rekezitus ne’ebé establese ona.

Rezolusaun Governu númeru 4/2020, 2 marsu, ne’ebé revoga tiha rezolusaun númeru 16/2013 hodi fó informasaun ba Grupu Arte Marsiál  (GAM) tolu hanesan, Persaudaraan Setia Hati Terate (PSHT), Ikatan Kera Sakti (IKS) Timor-Leste ho Kmanek Oan Rai Klaran (KORK) bele kumpre regra sira-ne’e.

Grupu Arte marsiál tolu ne’e, presiza kumpre kritéria rejistrasaun 18 mak hanesan;

  1. Estatutu federasaun/organizasaun ho lian Tetun no Portugés ne’ebé aprova iha asembleia jerál, 2. Akta kongresu federasaun ka organizasaun,
  2. Estatutu Federasaun/Organizasaun, kartaun identidade (BI, Kartaun Eleitorál no dokumentu relevante).
  3. Patrimóniu organizasaun.
  4. Atributu no materiál ne’ebé utiliza hodi pratikante arte-marsiál uza durante iha fatin treinu.
  5. Mapa lokalizasaun treinu no fatin eskritóriu.
  6. Fundadór mínimu ema na’in-10 kompleta ho kartaun (BI, Kartaun Eleitorál no dokumentu relevante).
  7. Boom komportamentu treinadór ba sentru, klube no eskola ne’ebé destinu ba pratika arte marsiál.
  8. Atestadu médiku treinadór.
  9. Karta autorizasaun husi xefe suku no na’in ba rai (ba fatin treinamentu no fatin eskritóriu.
  10. Nivel sertifikadu.
  11. Foto treinadór.
  12. totál membru tenke na’in-50 kada sentru, klube ka eskola.
  13. Baze dadus hosi membru hotu no nia responsável iha munisípiu 12 inklui REAO.
  14. Karta afiliasaun husi federasaun/organizasaun internasionál (ba organizasaun ne’ebé mai husi estranjeiru).
  15. Deklarasaun hosi sentru, klubu ka eskola atu la afilia ba partidu polítika.
  16. Deklarasaun laiha konflitu internál no externa organizasaun.
  17. Karta rekomendasaun husi FESTIL (ba organizasaun ne’ebé hamahon aan iha FESTIL).

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!