EKONOMIA, HEADLINE

BNCTL iha misaun lima promove dezenvolvimentu ekonomia nasionál

BNCTL iha misaun lima promove dezenvolvimentu ekonomia nasionál

Abertura semináriu nasionál ne’ebé realiza hosi BNCTL, iha salaun Rudal, segunda (09/05). Imajen Tatoli /Egas Cristóvão

DILI, 09 maiu 2022 (TATOLI)–Banku Nasionál Komérsiu Timor-Leste (BNCTL, sigla portugés), segunda ne’e, realiza semináriu nasionál ho tema “papél setór bankária no setór privadu hodi promove dezenvolvimentu ekonomia nasionál”, nune’e bele hala’o knaar no kontribuisaun ba dezenvolvimentu nasionál di’ak liután. 

Prezidente Konsellu Administrasaun BNCTL, António Vítor, hateten, banku ne’e tenke halo tuir vizaun no misaun bainhira atu hakat ba oin tanba tenke sai banku komersiál prinsipál iha Timor-Leste no timor-oan hotu iha mundu tomak.

“Ita iha misaun boot lima ne’ebé tenke halo biar la fasil tanba tenke responsabiliza ba kustu ne’ebé la’ós oituan no sei labele alkansa hotu dala-ida kedas iha tempu badak,” Prezidente Konsellu Administrasaun BNCTL dehan durante serimónia, iha salaun Rudal, iha Hudi-laran, segunda ne’e.

Notísia relevante: BNCTL loke ATM iha Caicoli hodi fasilita kliente halo tranzasaun

Misaun dahuluk, banku nasionál ne’e tenke sai banku ba timor-oan hotu iha fatin hotu hanesan iha área rurál, sentru urbanu no iha tasi-balun, ne’ebé ezije kustu operasaun boot, teknolojia modernu, kapabilidade adekuadu no apropriadu.

Misaun daruak, tenke fornese prestasaun servisu ka asesu ho kustu razoável ka kustu ne’ebé ema hotu bele selu iha aspetu komersiál ne’ebé dala barak sei limitadu bainhira hala’o misaun.

Misaun datoluk, tenke serbí ho maneira amigável liu, lais liu, baratu liu, no seguru liu, ne’ebé BNCTL rekoñese maski halo ona buat barak maibé seidauk bele satisfaz espetativa ema barak nian.

Misaun dahaat, tenke kontribui ba dezenvolvimentu ekonomia nasionál, ne’ebé banku nasionál ne’e halo buat balun ona no sei bele halo barak tan.

Misaun dalimak, konsidera todan liu mak tenke kontribui hamenus kiak no mukit, ne’ebé banku mesak sei labele la’o maibé iha ona referénsia balun katak hamutuk ho banku ne’e ema balun bele sai di’ak ona.

Aleinde ne’e, BNCTL opta estratéjia jerál atu kontinua halo espansaun no kreximentu ba kréditu, nune’e atrai kliente barak liután, ho prestasaun no kanál servisu dijitalizadu modernizasaun, fortalesimentu no kapasitasaun rekursu umanu, inklui kontinua diversifika produtu.

Servisu bankária foun

Iha prazu badak ka tinan 1 (metade 2017 to’o 2018) BNCTL halo transformasaun hosi sistema bankária mikro banking ba sistema apropriadu liu ba banku komersiál, ne’ebé fasilidade foun ne’ebé banku komersiál barak iha mundu uza koñesidu ho T24, nune’e bele posibilita BNCTL iha tranzasaun automatizadu no dijitalizadu (POS, ATM, banking) no bele iha tranzasaun internasionál ka bele sai mós membru SWIFT Internasionál.

Iha prazu média (to’o tinan 2020) BNCTL nia estratéjia atu mellora iha área administrasaun, fortifika jestaun, no operasaun liuliu kontrolu internál no kapabilidade jestaun risku, melloramentu ba infraestrutura bankária no liuliu ba infraestrutura fízika atubele garante atendimentu dignu liu ba sidadaun no sira ne’ebé kliente banku.

“Ho intervensaun hirak ne’e hotu, objetivu atubele pozisiona BNCTL nu’udar banku komersiál prinsipál ne’ebé sei mobiliza fundu no konsede kréditu barak liu. Felizmente ita konsege hetan progresu gradualmente ba meta ida-ne’e, embora iha atrazu uitoan tanba fatór balun hosi laran. Iha prazu naruk (to’o tinan 2022) BNCTL prevee ona estratejia halo intervensaun boot liu bazeia ba alkansa iha kurtu no médiu prazu,” António Vítor dehan.

Hosi aspetu seluk ne’ebé entidade seluk tenke halo hodi kondisiona operasaun banku komersiál ho di’ak no seguru inklui enkuadramentu legál oioin hanesan lei rai nian hanesan lei bankarrota nian hanesan Contract Enforcement Law, etc.

Enkuantu, estratéjia prinsipál longu prazu mak bele halo transformasaun, modernizasaun, kapasitasaun no kapitalizasaun iha períodu anterior hodi bele fó resposta ba demanda boot liu iha área investimentu produtivu, apoia dezenvolvimentu setór privadu, no bele konsede kréditu ho kustu baratu liu, ho maturidade naruk liu no ho montante boot liu, maibé ho konfortabilidade no flexibilidade ne’ebé di’ak liu.

“Ho orgullu ha’u bele BNCTL bele hamriik hamutuk ona ho banku estranjeiru sira no hakat ona ba oin uitoan ein termu de kuota merkadu kréditu no depozita, ne’ebé ita agora tama ona ba banku ne’ebé ema barak liu,” Prezidente Konsellu Administrasaun BNCTL dehan.

Jornalista : Tomé Amado

Editora      : Julia Chatarina

iklan
iklan

Leave a Reply

iklan
error: Content is protected !!