DILI, 09 maiu 2022 (TATOLI)—Ministériu Ensinu Superiór Siénsia no Kultura (MESSK) tempu badak sei manda paresér ba Banku Nasionál Komérsiu Timor-Leste (BNCTL) atu loke oportunidade kréditu dahuluk ba Instituisaun Ensinu Superiór Privadu (IESP) ba programa Ensinu Superiór Kualidade+.
“Ita la’o tuir nafatin dekretu-lei ne’ebé estabelese ona, tanba ne’e laiha buat ida maka difikulta prosesu kréditu ne’ebé hato’o ona. Daudaun ne’e ita simu ona proposta kréditu lima inklui ona proposta hosi Universidade da Paz (UNPAZ),” Ministru Ensinu Superiór, Siénsia no Kultura (MESSK), Longuinhos dos Santos, informa iha resintu Parlamentu Nasionál, segunda ne’e.
Tuir governante ne’e, normalmente pedidu ba liña kréditu tenke hato’o ba BNCTL, hafoin banku rasik haruka filafali karta ruma ba Governu liuhosi ministériu tutela atubele halo paresér ruma.
Nune’e, Ministru rejeita deklarasaun parte relevante seidauk prosesa proposta kréditu.
“Ita la haruka filafali ba banku, ita hahú halo daudaun paresér ba banku atu hatene posibilidade sira bele halo kréditu ka lae. Tanba iha buat balun ita tenke halo paresér kona-ba Instituisaun Ensinu Superiór Privadu sira ne’ebé atu halo kréditu,” nia akresenta.
Notísia relevante: UNPAZ seidauk asesu liña kréditu ba ‘Ensinu Superiór Kualidade Plus’
Iha sorin seluk, Prezidente Konsellu Administrasaun BNCTL, António Vítor, dehan, kada pedidu asesu kréditu sempre iha ninia prosedimentu, nune’e bainhira aplikante la prienxe rekezitu maka banku labele fasilita.
“Ministériu Ensinu Superiór mak tenke haree no halo uluk ida-ne’e molok atu haruka mai banku, tanba sistema kréditu de’it hanaran suave, ne’ebé ninia diskusaun sira parte tékniku halo ona maibé nu’udar Prezidente, ha’u seidauk hetan informasaun,” nia akresenta.
Antes ne’e, Governu prevee ona millaun $5 iha BNCTL atu garante kréditu finanseiru.
Ba inisiativa ne’e, la eziste limitasaun ba IESP atu halo kréditu, maibé Governu bele garante tetu másimu to’o $500.000, ne’ebé ekivalente ho funan 3% kada tinan.
Rekizitu banku ba universidade sira, bainhira atu halo kréditu tenke prepara planu negósiu, tenke aprezenta relatóriu finansiál, tenke aprezenta kaixa kustu (osan tama ka sai), inklui seguransa katak kreditór iha osan sufisiente atu selu obrigasaun ba banku.
Jornalista : Tomé Amado
Editora : Julia Chatarina
