DILI, 09 maiu 2022 (TATOLI)-–Governu liuhosi reuniaun Konsellu Ministru (KM) estraordinária, segunda ne’e, aprova Projetu Dekretu-Lei, ne’ebé aprezenta hosi Ministru Administrasaun Estatál (MÃE), Miguel Pereira de Carvalho, kona-ba programa Uma ba Ema Kbiit Laek Plus (UKL+).
“Uma-kain vulnerável liu sei benefisia programa UKL+, ne’ebé ba ema ho rendimentu médiu kada loron la liu $1,25 no sira-nia uma ho kondisaun a’at hela,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Inisiativa ne’e hetan ona aprovasaun iha sorumutuk KM iha loron 06 maiu 2022, maibé tanba alterasaun balun mosu iha faze redasaun finál, maka tenke submete fali ba KM atu hetan fali aprovasaun.
Notísia relevante: Governu estabelese rejime espesiál aprovizionamentu ezekusaun medida UKL+
Dekretu-Lei ida-ne’e estabelese rejime espesiál aprovizionamentu ne’ebé haree liu ba ezekusaun medida UKL+.
“Ho rejime foun ne’e, ba oin sei prevee opsaun rua, hanesan ho atribuisaun subvensaun liuhosi estrutura suku ba Programa Nasionál Dezenvolvimentu Suku (PNDS) no posibilidade atu halo aprovizionamentu sentralizadu, nune’e bele iha poupansa ba rekursu ekonómiku,” Portavóz Governu esplika.
Programa ne’e mai ho objetivu atu hadi’a kondisaun uma, ne’ebé sai nu’udár hela-fatin permanente ba uma-kain vulneravel liu, nune’e bainhira uma sira ne’e a’at hela no uma-kain sira laiha uma seluk atu hela ba.
Uma-kain ne’ebé vulnerável liu, bele benefisia tuir modalidade apoiu sira hanesan apoiu finanseiru ba obra, konservasaun ka reparasaun hosi ninia hela-fatin, to’o valór másimu $13.000, no apoiu hanesan materiál konstrusaun ba substituisaun materiál kobertura no revestimentu hosi ninia hela-fatin, to’o valór másimu $4.000.
Jornalista : Antónia Gusmão
Editora : Julia Chatarina
