BAUCAU, 10 maiu 2022 (TATOLI) – Arkivu Muzeu no Reziténsia Timorense (ARMT) hamutuk ho autoridade munisipál Aileu sei koordena atu konstrui jardín levantementu armada ne’ebé tuir planu sei hanesan jardín Prezidente Francisco Xavier do Amaral.
Arkivu no Múzeu Rezisténsia Timor-Leste (AMRT-sigla portugés) prioritiza sistema jestaun ba arkivu istóriku sira iha tinan fiskál 2021 no 2022.
Papél Arkivu no Múzeu Rezisténsia Timor-Leste (AMRT), I.P iha misaun prinsipál mak prezerva, valoriza no divulga memória rezisténsia no kultura povu timorense nian.
Atu kumprimenta ba misaun ne’e, AMRT dezenvolve atividade konservasaun, organizasaun no disponibilizasaun respetivu fundu dokumentál, organiza no promove inisiativa divulgasaun públika no apoia atividade ne’ebé kontribui ba valorizasaun memória rezisténsia nasionál.
Tuir planu, kuarta, loron 11 fulan-maiu sei iha sorumutu ho administradór munisípiu Aileu hodi ko’alia asuntu kontinuasaun ligadu ho estatutu rai ba fatin konstrusaun.
“Ita sei instala jardín ida ne’ebé reflete ba revantamentu armada no insureisaun forsa armada ne’ebé nu’udar sentru pilotu dahuluk formasaun kuadru hotu iha Aileu,” Diretór Ezekutivu ARMT Hamar, António Baptista Alves, informa ba Agência Tatoli iha Vila Nova, tersa ne’e.
AMRT hato’o ona pedidu ba Ministériu Justisa no hein atu ekipa tékniku atu halo mediasaun ba fatin konstrusaun ho medida rai hektare 2-resin ne’ebé sei utiliza ba konstrusaun edifísiu no jardín.
Objetivu konstruisaun jardín, sub-depozitu jerál no arkivu espozisaun nune’e futuru fasilita estudante sira bainhira hala’o prosesu aprendizajen liuliu pesikija faktu reál iha fatin refere tanba munisípiu Aileu sei sai hanesan sidade universitáriu.
Daudaun ne’e sei hala’o estudu tékniku no levantamentu estudu istoriál bazea ba dokumentu ne’ebé rekolla.
“Graça a deus estudu tékniku ne’e bele hetan aprovasaun iha tempu badak, 2023-2024 ita bele tama ona ba implementasaun,” Hamar akresenta.
Tuir planu, tinan ne’e sei aprezenta planu estudu tékniku ba komisaun revizaun orsamentál atu hetan aprovasaun no tuir mai sei aperzenta tán rezultadu estudu ba Konsellu Administrasaun Fundu Infraestrutura (KAFI) atu avalia hodi hetan aprovasaun antes realiza konstrusaun.
AMRT mós sei konstrui fazeadamente muzeu iha kada munisípiu nune’e fasilita asesu ba sidadaun no estudante sira kona-ba istória luta Timor-Leste nian.
Daudaun ne’e, AMRT identifika ona abrigu hamutuk 20 resin iha territóriu nasionál hanesan parte área oeste hamutuk sia, rai-klaran lima, Manatuto rua, Baucau hamutuk tolu.
Jornalista : Natalino Belo
Editór : Evaristo Soares Martins
