Funsionáriu Terra Propriedade na’in-15 kompleta vasina faze datoluk
COVALIMA, 10 maiu 2022 (TATOLI)—Diretór Terras Propriedade Covalima, Helder Godinho Martins, informa funsionáriu na’in-15 ne’ebé presta servisu iha Terra no Propriedade munisípiu Covalima kompleta ona vasina faze datoluk.
Vasina ne’e hodi bele prenxe rekezitu balun ne’ebé presiza liu-liu iha área Ministeriu Justisa Terras no Propriedade no kontribui ba programa hosi Estadu nian.
“Simu vasina faze datoluk ne’e importante ba funsionáriu sira, liu-liu ba funsionáriu sira-nian ne’e importante tebes ba prevensaun COVID-19. Hosi ne’e ba oin kartaun kinur ne’e importante sira, liu-liu iha área Ministeriu Justisa Terra no Proriedade nian,” Helder Godinho Martins hateten ba jornalista sira, hafoin simu vasina faze datoluk, iha edifísiu Terra no Propridade Covalima, tersa ne’e.
Funsionáriu ne’ebé servisu iha Terra no Propriedade Covalima hamutuk na’in-15 ne’e kompostu hosi Funsionáriu Públiku na’in-lima (5), kontratadu na’in-neen (6) no voluntáriu na’in-tolu (3), no funsionáriu delegasaun hosi administrasaun Covalima mai Terra no Propriedade na’in-ida (1).
Antes ne’e, Ministra Saúde, Odete Maria Freitas Belo, enkoraja komunidade no estudante sira atu simu vasina aumenta imunidade hodi hasoru moras COVID-19, tanba Governu tenke fasilita sidadaun hodi hetan kartaun vasina, nune’e moras labele da’et sidadaun sira mós tenke kontribui moras la’ós iha Timor-Leste de’it maibé ida-ne’e problema mundiál.
Jornalista : Celestina Teles
Editór : Cancio Ximenes
