BOBONARO, 10 maiu 2022 (TATOLI) – Sekretariadu Tékniku Administrasaun Eleitorál (STAE) Munisípiu Bobonaro, hahú ona atividade Resensiamentu Eleitorál Atualizasaun Baze Dadus (REABD, sigla portugés) nune’e rejista eleitór foun ne’ebé atinje ona ida 17 ba leten hamutuk na’in-58.
STAE Munisípiu Bobonaro hala’o resensiamentu eleitorál bazea ba Lei Númeru 19/2021, 8 Setembru-Alterasaun dahuluk hosi Lei Númeru 6/2016, 25 Maiu (Lei Resensiamentu Eleitorál).
Nune’e artigu 11 (finalidade no atualizasaun) númeru 1 hosi lei ne’e hateten, atividade REABD nu’udar atividade permanente bainhira remata eleisaun, STAE kontinua atividade rútina resensiamentu eleitór foun.
Atividade ne’e la’o durante seman rua ona, hahú hosi loron 03 maiu ne’e, maibé provizoriumente sei konsentra de’it iha edifísiu STAE munisipál.
“Ami rejista eleitór foun hamutuk 58 kompostu hosi feto na’in-30 no mane na’in-28, depois eleitór tuan ka hadi’a dadus hamutuk 85, mane 63, feto 22 totál hamtuk 103 mak ita rejista ona atvidade resensiamentu eleitorál autalizasaun baze dadus,” nia informa ba Tatoli, iha kna’ar-fatin, tersa ne’e.
Diretór ne’e akresenta, kritéria hosi REABD mak ba sidadaun sira-ne’ebé atu trata kartaun foun tenke lori dukumentu importante haat mak hanesan, Billete Identidade (BI) válidu, Sertidaun RDTL, pasaporte Timor-Leste válidu no deklarasaun hosi xefe suku atuál.
Enkuantu ba hirak-ne’ebé presiza muda ka hadi’a dadus, ezemplu kartaun eleitorál lakon, eleitór sira obrigatoriumente lori dukumentu sira hanesan, deklarasaun lakon hosi PNTL, BI, sertidaun RDTL no deklarasaun xefe suku no sira-ne’ebé hadi’a presiza lori de’it dukumentu tolu ne’ebé mensiona ona iha leten.
Tuir dadus ne’ebé STAE Bobonaro rejista, eleitór tuan ne’ebé partisipa ona iha eleisaun prezidensiál volta dahuluk no daruak períodu 2022-2027 hamutuk na’in 70.311 mai hosi postu administrativu Atabae, Balibo, Cailaco, Maliana, Bobonaro no Lolotoe.
Jornalista : Sérgio da Cruz
Editór : Evaristo Soares Martins
