BOBONARO, 12 maiu 2022 (TATOLI) — Bispu Dioseze Maliana, Don Norberto do Amaral, kinta ne’e realiza misa krismál hodi fó bensa ba mina santu no halo renovasaun promesa saserdotál ba nia an-rasik no amu-lulik sira ne’ebé hakna’ar aan nudár bibi-atan serbi sarani sira iha dioseze Maliana, munisípiu Bobonaro.
Nai lulik sira-ne’ebé selebrasa misa krismál no renovasaun promesa saserdotál ne’e mak hanesan, Reverindisimu Bispiu Dioseze Maliana, Don Norberto do Amarál, Vigáriu Jerál Dioseze Maliana Lúcio Norberto de Deus, amu pároku 11 no amu vigáriu parokiál sira nune’e bele fiél nafatin ba knaar santu nian ho loloos.
Enkuantu mina santu ne’ebé Don Norberto fó bensa hamutuk tolu, kompostu hosi mina krisma, katekunu no mina-sarani ba ema moras sira, mina hirak-ne’e nu’udar matéria prima ba selebrasaun sakaramentu sira, tanba ne’e amu-lulik sira presiza hetan hodi hakbi’it sira halo serbisu hanesan salvasaun arma ba sarani sira bainhira presiza.
Iha Omília, Don Norberto hateten, Jesus mak Maromak kose-mina atu halo planu tomak ba ema hotu ne’ebé iha lian hodi haklaken liafuan di’ak ba ema sira-ne’ebé atu rona nia, liuhosi nia liafuan no hahalok, tanba espíritu santu mak hún ba nia no espíritu santu mak lori nia ba hetan dalan foun.
Tanba ne’e iha selebrasaun misa krismál ne’e atu amu-liluk sira nafatin sai manu-ain hodi hakalaken Maromak nia liafuan liuhosi fuan no hahalok iha kna’ar loron-loron hodi serbí sarani sira-ne’ebé tau fiar Jesus Kristu.
“Nudar ema ne’ebé nai kose mina, hola-an no tau figura an hanesan Jesus, tenke hatudu lala’ok hirak-ne’e iha ita nia-aan, atu ita bele haklaken na’in Jesus nia liafuan no atu haklaken didi’ak presiza hatuUr ita nia Aan Nu’udar liurai, liurai ida-ne’ebé la hanoin aan de’it, la halo kna’ar ho nia gostu, maibé tenke ukun ho didi’ak nune’e ita sai profeta ida atu haklaken no ko’alia Maromak nia liafuan iha moris loron-loron,” Don Noberto hateten.
Bispu ne’e mós husu ba sarani sira atu hasa’e orasaun ba nai-lulik sira atu nafatin sai santu, laran di’ak, badinas hodi nune’e sira bele konfigura sira-nia an didi’ak ho nai Jesus.
Alcino Barreto João, reprezenta sarani sira iha dioseze ne’e kogratula amu-lilik sira sira hotu ba renovasaun promesa saserdotál ne’e.
“Ami hato’o parabéns ba nai lulik sira hotu iha Dioseze Maliana, no ami sarani sira hotu nafatin halo orasaun atu nai-lulik sira hotu nafatin sai bibi-atan di’ak ba ami sira iha dioseze ne’e serbisu tuir buat loos ne’ebé haklaken hosi Maromak,” nia hateten.
Jornalista : Sérgio da Cruz
Editór : Evaristo Soares Martins
