COVALIMA, 12 maiu 2022 (TATOLI)—Komisaun Antí Korrupsaun (CAC, silga portugés) realiza semináriu ho tema “Papel Líder Komunitária ba Prevene no Kombate Korrupsaun iha Timor-Leste” ba líder komunitária sira iha postu administrativu Zumalai, munisípiu Covalima.
Reprezentante Administradór Postu Administrativu Zumalai, Amandio da Silva, hateten semináriu ida-ne’e importante ba líder komunitária sira hodi bele halo prevensaun no kombate korrupsaun iha sira ida-idak ninia knar fatin no sosiedade.
“Ohin ita-mai hamutuk iha-ne’e importante, atu rona imformasaun kona-ba prevensaun no kombate korrupsaun, tanba iha ita-nia família no sosiedade loro-loron prátíka hela maibé dala ruma ita la preokupa,” Autoridade Munisipál ne’e hato’o iha nia diskursu, iha salaun postu administrativu Zumalai, kinta ne’e.
Prátika korrupsaun iha família hanesan osan ba fó ferik-oan sosa modo iha merkadu ho presu $5,00 de’it, maibé nia hato’o gasta osan $10,00, nune’e bainhira hetan kofiansa asume kargu xefia bele halo korrupsaun ho osan ne’ebé boot liu.
Adjuntu Komisáriu CAC ba Asuntu Prevensaun no Sensibilizasaun, Luís Oliveira Sampaio, hato’o agradese ba líder komunitária nia partipasaun iha semináriu hodi ko’alia kona-ba prevensaun no kombate korrupsaun iha Timor-Leste.
“Ita rona korrupsaun dala barak akontese de’it iha nivél nasionál, maibé orsamentu jerál Estadu sirkula iha suku to’o aldeia sira. La’ós ita-boot sira mak prátíka korrupsaun maibé nu’udar autoridade lokál iha responsabilidade atu prevene no kombate korrupsaun ne’e,” nia dehan.
Tanba, autoridade lokál nia papel importante hodi asegura rekursu Estadu no papel Estadu aloka orsamentu to’o duni ba komunidade, nune’e korrupsaun la’ós ba ema politiku, membru Governu no diretór sira de’it maibé korrupsaun akontese iha fatin-fatin maske la envolve direta maibé partisipa haree no husik hela.
Oradór ba semináriu ne’e, Diretora Nasionál Asuntu Promosaun Valór no Integridade, Leonilda Rosa Soares Lobato, aprezenta matéria papél CAC definisaun korrupasaun kauza no oinsá dalan atu halo prevensaun, no oradór daruak Adjuntu Komisáriu CAC ba Asuntu Prevensaun no Sensibilizasaun, Luis Oliveira Sampaio, aprezenta matéria medida prevensaun kombate korrupsaun.
Jornalista : Celestina Teles
Editór : Cancio Ximenes
