iklan

DILI, HEADLINE, POLÍTIKA, SEGURANSA

PN aprova projetu lei Responsabilidade Prezidente Repúblika iha jeneralidade

PN aprova projetu lei Responsabilidade Prezidente Repúblika iha jeneralidade

Imajen/Media PR.

DILI, 12 maiu 2022 (TATOLI)—Parlamentu Nasionál, kinta ne’e liuhosi reuniaun plenária extraordináriu aprova projeitu lei númeru 42/V (4a)-kona-ba Responsabilidade Prezidente Repúblika iha faze jeneralidade.

“Rezultadu votasaun a-favór 36, kontra 24 no abstensaun 0, nune’e projetu lei númeru 42/V (4a) Responsabilidade Prezidente Repúblika aprovadu iha faze jeneralidade,” Prezidente Parlamentu Nasionál, Aniceto Longuinhos Guterres Lopes, deklara iha iha sala plenária.

Ho aprovasaun ne’e, Komisaun A ne’ebé trata asuntu Justisa no Konstituisional sei halo relatóriu paresér hodi kontinua ba diskusaun espesialidade.

Enkuantu, hafoin iha diskusaun faze jeneralidade Komisaun A lideradu, Deputadu, Joaquim dos Santos aprezenta relatóriu komisaun nian katak projetu lei ne’e prenxe rekezitu konstituisionál, legál no rejimentál hodi bele diskute iha jeneralidade no aprova.

Preámbulu Projetu lei Responsabilidade Prezidente Repúblika mak Prezidente Repúblika responde ba krime prátikadu iha exersísiu funsaun no violasaun klara no grave obrigasaun konstituisionál perante Supremu Tribunál Justisa inisiativa hosi Parlamentu Nasionál, tuir termu iha artigu 97 konstituisaun. Distinsaun ne’e afirma fundamentu autónomu ba efetivasaun responsabilidade Prezidente Repúblika, ne’ebé bele lori destituisaun.

Exersísiu ne’e interesa konsidera Kódiku Penál prevee krime prátika iha exersísiu funsaun públika, norma aplikavel ba krime prátikadu iha exersísiu funsaun PR.

Objetu prezente lei estabelese rejime jurídiku responsabilidade PR hosi krime komete iha exersísiu funsaun ka violasaun klara no grave obrigasaun konstituisionál, no prezente lei define konduta típika krime komete iha exersísiu funsaun hosi PR estabelese respetiva sansaun.

Projeitu lei ne’e iha artigu hamutuk 30, hahú hosi Kapítulu I Dispozisaun Jerál ho nia artigu rua, Kapítulu II Tramitasaun Prosedimentu Komun ho artigu hitu, Kapítulu III Krime Kometidu iha exersísiu funsaun Prezidente Repúblika, Sesaun I Dispozisaun Jerál ho artigu tolu.

Sesaun II Dispozisaun Penál Espesiál ho artigu 10, Sesaun III Dispozisaun Espesiál Prosesu Penál ho artigu tolu, Kapítulu III Violasaun Klara no Grave Obrigasaun Konstituisional ho artigu haat no Kapítulu V Dispozisaun Finál ho artigu rua.

Projeitu lei ne’e asina hosi Deputadu Fretilin, Joaquim dos Santos, Deputadu PLP, Francisco de Vasconselos no Deputadu KHUNTO, Luís Roberto.

Antes ne’e, Prezidente Komisaun A, Joaquim dos Santos ‘Borululi’, hateten tuir loloos lei ne’e halo kedan iha mandatu dahuluk iha Prezidente Repúblika sira kotuk maibé la konsege, entaun liu tiha tinan 20 mak foin inisia fali lei ne’e.

“Lei ne’e kona-ba responsablidade órgaun soberania neste kazu Prezidente Repúblika nia responsabilidade. Lei ne’e nia efeitu atu regula PR nia responsabilidade, nune’e to’o iha momentu ruma nia viola ninia kompeténsia, viola ninia dever ne’ebé tuir konstitusaun. Entaun ita iha ona norma ida nune’e garantia Tribunál atu halo julgamentu, se iha aktu ruma violentu kontra konstituisaun,” Joaquim dos Santos hateten.

Tuir nia, lei ida-ne’ebé daudaun ne’e Parlamentu Nasionál inisia ne’e hanaran lei ba responsabilidade. Lei ne’e aprova la’ós automatikamente ba hatun Prezidente Repúblika ida, lei ne’e norma ida-ne’ebé atu garantia estabilidade polítika no lalika interpreta oioin.

“Ema hanoin Parlamentu halo lei ne’e atu ba lori hatun Prezidente Repúblika, la’ós ida-ne’e. Ha’u dehan tiha ona lei ne’e instrumentu ida atu mai kompleta normativu enternu Estadu nian kona-ba justisa no Judisiáriu Timor-Leste. Ne’ebé, labele interpreta sasán ne’e,” nia dehan.

Deputadu CNRT, Carmelita Moniz, hateten Deputadu hosi Bankada Fretilin, PLP no KHUNTO asina projetu-lei ida kona-ba responsablidade Prezidente Repúblika atu hatun Prezidente Repúblika, tanba iha Konstituisaun RDTL hakerek katak responsabilidade ida mak responsabilidade kriminál no seluk fali responsablidade violasaun grave ba konstituisaun.

“Agora sira halo lei ida-ne’e ba Prezidente Repúblika. Ita atu halo lei ida ita tenke respeitu prinsípiu konstitusionál sira, prinsípiu internasionál no universál, ne’ebé ita adota liuhosi ita-nia konstituisaun artigu 9,” Deputada bankada CNRT ne’e hateten.

Konstituisaun artigu 9 (Simu Direitu Internasionál) iha alínea 1 hateten, órden jurídika Timor nian adopta PRINSÍPIU sira direitu internasionál jerál nian eh hotu-hotu nian; alinéa 2 haktuir norma sira-ne’ebé mai iha konvensaun, tratadu no akordu internasionál sira-nia laran vigora iha orden lei rai-laran nian, bainhira hetan aprovasaun, ratifikasaun eh adezaun hosi órgaun kompetente ida-idak no bainhira publika tiha ona iha jornál ofisiál; no alínea 3 dehan norma sira-ne’e sei laiha folin, sira la tuir karik konvensaun no akordu internasionál sira-ne’ebé lei Timor nian simu tiha ona.

Nia dehan, halo lei ida labele viola prinsípiu internasionál no tenke respeita prinsípiu igualdade, tenke trata ema hotu-hotu hanesan no labele halo lei ida ba kargu ida de’it.

“Se hakarak halo ida-ne’e, tenke halo lei ida responsabilidade kriminál ba kargu titulár no kargu polítiku. Iha kazu ida-ne’e, responsabilidade kriminál kargu polítiku. Lei ida-ne’e aplika ba Prezidente Repúblika, Prezidente Parlamentu Nasionál, Membru Deputadu sira hotu, ba Primeiru-Ministru no Ministru sira hotu. Labele halo lei ida ba Prezidente Repúblika, labele intensaun ida ne’e,” nia hateten.

Nia dehan, kona-ba projetu-lei ba responsablidade Prezidente Repúblika ne’e, Komisaun A foin daudaun halo audiénsia ho Vise Ministru Justisa no Governante ne’e husu ba deputadu tenke respeita prinsípiu igualidade no parte komisaun A sei haree oinsá atu halo lei ne’e ba oin.

“Ba ami bankada CNRT, ami lakohi halo lei ida-ne’ebé ke kontra prinsípiu konstitusinál, prinsípiu universal, ami lakohi,” nia dehan.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!