BAUCAU, 12 maiu 2022 (TATOLI) – United Nations Development Programme (UNDP) hamutuk ho Sekretáriu Estadu Ambiente (SEA) konsulta Stockholm ka planeta saudável ba responsabilidade ema hotu ho líder komunitária iha munisípiu Baucau.
Konsultadór Tékniku Projetu Konsultasaun Stokholm+50 UNDP, Gil Zairo Ximenes, hateten, UNDP hetan fiar hosi governu Suésia atu implementa programa ne’e iha Timor-Leste ne’ebé kolabora ho SEA hodi buka meiu atubele akumula opiniaun, sujestasun hosi autoridade sira inklui sosiedade sivíl nune’e bele atinje planeta sustentável no prosperidade ba ema hotu-hotu.
“Ida-ne’e mak tema importante hosi programa stocholm nian no atu atinje ne’e sai hanesan responsabilidade ba ita hotu nune’e mos ita-nia oportunidade,” Konsultadór Tékniku Stokholm+50 UNDP hateten iha Salaun Konvensaun Baucau (CCB, sigla portugés) Vila Antiga, kinta ne’e.
Stockholm ho tema prinsipál tolu hanesan, dahuluk oinsá kria relasaun prozitivu entre ema ho naturál nune’e bainhira estragu barak presiza atu hadi’a fali, daruak mak kauza pandemia ne’ebé presiza identifika metódu atu uza hodi rekupera hosi covid-19 ne’ebé afeta maka’as iha ekonomia no buka métodu sira-ne’ebé sustentável.
Datoluk mak kona-ba politika estratéjiku governu nian kona-ba asaun ambientál mundu ba Timor-Leste ne’ebé matak no tranzisaun ekonomia sustentável nune’e presiza ajusta ho planu nasionál dezenvolvimentu ne’ebé seidauk atinje tuir meta penetrasaun enérjia renovavel iha tinan-2020 nune’e presiza atu identifika dezafiu ho entidade hotu.
“Objetivu importante mak ita hakarak atu kria kultura inkluzivu ida atu fó solusaun ne’ebé sustentável,” Gil Ximenes akresenta.
Diretór Jerál SEA, João Carlos Soares hateten, atividade ne’e ho entidade hotu relasiona ho programa Stockholm+50 hanesan parte atu husu opiniaun no sujestasaun kona-ba ambiente nune’e sei aprezenta iha selebrasaun loron aniversáriu ambiente ba tinan 50 iha loron 2-3 fulan juñu ne’ebé tuir planu sei selebra iha sidade Stockholm, Suésia.
“Bainhira ita hetan ona sujestaun, hanoin balun husi entidade sira, ita hatama iha relatóriu atu ba tuir konferénsia,” João Soares hateten.
Timor-Leste ratifika ona konvensaun haat kona-ba ambientál nian hanesan alterasaun klimátika, biodiversidade, degradasaun no materiál protokolu kona-ba ozonu.
Jornalista : Natalino Belo
Editór : Evaristo Soares Martins
