iklan

BAUCAU, HEADLINE, INKLUZAUN SOSIÁL, MUNISÍPIU, SEGURANSA

Inséndiu iha Baucau rezulta uma-lisan ida mutuk

Inséndiu iha Baucau rezulta uma-lisan ida mutuk

Uma-lisan Bobulesa-Bufuru, knua Mondelio ne'ebé estragu bainhira mosu inséndiu iha suku Larisula, postu administrativu Baguia. Imajen espesiál.

BAUCAU, 13 maiu 2022 (TATOLI) – Kazu inséndiu ne’ebé akontese iha suku Larisula, postu administrativu Baguia, munisípiu Baucau, rezulta uma-lisan Bobulesa-Bofuru, knua Mondelio mutuk. Kazu ne’e akontese iha loron-tersa, 10 maiu 2022.

Tomé de Almeida nu’udar família hosi uma-lisan Bobulesa-Bofuru, informa, kronolojia hosi akontesimentu ne’e seidauk hatene loloos tanba hela dook hosi fatin akontesimentu.

Uma-lisan Bobulesa-Bufuru, knua Mondelio ne’ebé estragu bainhira mosu inséndiu iha suku Larisula, postu administrativu Baguia. Imajen espesiál.

“Ha’u ba atu halo preparasaun serimónia kultura ‘haan hare foun’ maibé to’o iha-ne’ebá hela de’it ahi-kdesan no uma nia rin ho sasán uma-lisan ahi haan hotu kedas maibé la hatene sé mak sunu,” Tomé de Almeida informa liuhosi telefónika, sesta ne’e.

Nia haktuir, loloos jerasaun hosi uma lisan ne’e atu halo preparasaun hodi realiza serimónia kulturál ‘haan haree foun’ maibé to’o iha fatin refere kondisaun uma-lisan ahi haan mutuk maibé la hatene kazu akontesimentu refere tanba distánsia entre hosi uma-lisan no hela-fatin kilómetru neen-resin.

Akontesimentu ne’e rezulta sasán lulik uma-lisan nian hetan estraga totál tanba laiha membru família ruma iha fatin refere.

Parte vítima informa ona akontesimentu refere ba parte autoridade komunitáriu inklui Eskuadra Polísia Nasionál Timor-Leste (PNTL), postu administrativu Baguia hodi buka-tuir autór prinsipál ba kazu ne’e.

Parte família vítima sei realiza serimónia rituál tuir lisan suku nian hodi harohan no hasa’e ba bei-ala sira nune’e bele hatene loloos fukun hosi akontesimentu ne’e.

“Buka mak la hetan ona ema ne’ebé sunu uma-lisan ne’e, família sei tuur hamutuk hasa’e ba bei-ala uma-lisan nian mak ba buka-tuir,” Tomé akresenta.

Xefi suku Larisula, Mário de Jesus Ximenes, hateten, to’o agora seidauk hatene loloos motivu hosi inséndiu ne’e, no parte autoridade suku hato’o ona ba eskuadra PNTL Baguia atu halo investigasaun.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!