iklan

NASIONÁL, HEADLINE, SEGURANSA

PCIC komemora aniversáriu ba da-VIII

PCIC komemora aniversáriu ba da-VIII

Serimónia aniversáriu PCIC ba da-VIII ne’ebé realiza iha salaun Larigutu CNE, Caicoli, sesta (14/05). Imajen Tatoli/Cidália Fátima

DILI, 13 maiu 2022 (TATOLI)—Polísia Siéntifika Investigasaun Kriminál (PCIC, sigla portugés), sesta ne’e, komemora aniversáriu ba da-VIII ho tema ‘Competência as orgaõs Polícia Criminal A Nossa Nova Lei Investigação Criminal’.

Prezidente PCIC, Vicente Fernandes, hateten, durante ezisténsia, órgaun Estadu ne’e halo serbisu iha atividade kriminál ho prevensaun, ne’ebé depende liu ba Ministériu Justisa, Prokuradór no Tribunál.

“Maibé adminsitrativamente PCIC depende liuba Ministériu Justisa, ezemplu advokasaun ba orsamentu no proposta lei ruma hanesan parte kiik hosi depedénsia administrativa,” Prezidente PCIC dehan iha salaun Larigutu CNE, Caicoli.

Notísia relevante: Hamenus konfuzu, MJ husu MP delega kompeténsia ba PCIC-PNSIK ho loloos

Daudaun ne’e PCIC iha investigadór hamutuk 75 no espesialista laboratóriu hamutuk 36.

Tinan ne’e instituisaun konsege iha progresu, simu delegasaun kompeténsia hosi Ministériu Públiku no Tribunál.

“Signifika aumenta konfiansa ba PCIC nia serbisu, maibé ami hasoru dezafiu iha parte nível rekursu umanu, oinsá bele dezenvolve kapasidade rekursu umanu atu natón no sufisiente bele hala’o serbisu loron-loron iha ámbitu represaun no prevensaun krime sira,” nia akresenta.

Aleinde ne’e, PCIC simu delegasaun kompeténsia hanesan krime omesidu, krime kontra ema-nia vida ne’ebé la’ós mai hosi Dili de’it maibé hosi Prokuradória Baucau, Rejiaun Administrativa Espesiál Oé-cusse Ambeno (RAEOA) no Covalima.

Nune’e mós, rejista kazu krime hanesan falsifikasaun dokumentu no krime bosok ho númeru boot.

“Dadus sira ne’e la’ós aprezenta formalmente, maibé hatudu katak krime hirak ne’e akontese iha ita-nia país ne’ebé mak ita bele dehan grave hanesan relasaun sexual no omesidu ho forma agravadu, ne’ebé ita susar atu deskobre. Ita iha obrigasaun atu deskobre no entidade sira tenke iha kbiit no uza esforsu tomak atubele husu responsabilidade ema ne’ebé halo krime, aleinde ita rekopera prejuizu hosi krime,” nia dehan.

Maski nune’e, PCIC halo kooperasaun nasionál ho enstidade Estadu no Governu hanesan Polísia Nasionál Timor-Leste (PNTL), Komisaun Antí-Korrupsaun (CAC, sigla portugés) Servisu Imigrasaun, Banku Sentrál Timor-Leste (BCTL, sigla portugés) no seluk tan, ne’ebé mak ajuda promove investigasaun.

Iha fatin hanesan, Ministériu Justisa, Tiago Sarmento, hateten, maski PCIC foin eziste durante tinan-ualu maibé hatudu ona ninia kompeténsia tuir lei ne’ebé iha.

“Ita-boot sira presenza iha serimónia ne’e hatudu katak solidaridade instituisionál no hatudu vontade no kompromisu hotu, hamutuk fó liman ba malu atu prevene no kombate krime sira ho forma organizada. Husu hotu-hotu nia apoiu no tulun malu liuhosi koordenasaun atu halo susesu misaun PCIC iha Timor-Leste,” Ministru Justisa dehan.

Tuir governante ne’e, Governu nia prioridade a’as iha governasaun ho módulu kontempla, ne’ebé planu governativa kontinua reforsa rekursu umanu iha Tribunál, Ministériu Públiku no defensór públiku nu’udar meta atu promove justisa la’o ho forma efikásia no efisiente iha tempu ne’ebé razoável.

“PCIC iha diferensa ho Polísia Nasionál Servisu Investigasaun Kriminál (PNSIK), tanba ne’e servisu apoiu hosi PNSIK sai sasukat hodi garante halo seguransa paz sosiál iha rai ida-ne’e, ho esforsu tomak atu tane a’as liu Estadu direitu demokrátiku,” nia akresenta.

Ministru konsidera, PCIC nia ezisténsia klaru no sei la la’o tuir membru Governu nia hakarak de’it, tanba administrativamente órgaun Estadu ne’e depende ba MF, maibé nia funsionamentu depende ba Ministériu Públiku Prokurador Jerál.

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!